काठमाडौं । रसुवामा आएको विनाशकारी बाढीका कारण ज्यान गुमाउनेको संख्या ४६९ पुगेको छ। नेपाल प्रहरीले आज बिहान ७ः३० बजे सार्वजनिक गरेको पछिल्लो विवरणअनुसार बाढी तथा विपद्का घटनामा परी ९७७ जना अझै बेपत्ता छन्।
प्रहरीका अनुसार हालसम्म देशका विभिन्न जिल्लाबाट ४६९ जनाको शव फेला परेको छ। तीमध्ये सबैभन्दा धेरै शव चितवनमा फेला परेका छन्। चितवनबाट मात्रै १७८ जनाको शव फेला परेको प्रहरीले जनाएको छ।
त्यस्तै, नवलपरासी पूर्वमा ११०, गोरखामा ४४, नुवाकोटमा ३७, धादिङमा ३३, तनहुँमा २८, नवलपरासी पश्चिममा २७ र रसुवामा १२ जनाको शव फेला परेको छ। गोरखामा फेला परेका शवमा विभिन्न मानव अंगसमेत रहेको प्रहरी विवरणमा उल्लेख छ।
बाढी तथा पहिरोका कारण ठूलो मानवीय क्षति भएपछि सुरक्षा निकायले खोजी तथा उद्धार कार्यलाई निरन्तरता दिएको छ। अझै ठूलो संख्यामा मानिस सम्पर्कविहीन रहेकाले बेपत्ताको खोजी तथा पहिचान कार्य चुनौतीपूर्ण बनेको छ।
प्रहरीका अनुसार विपद्मा परी हालसम्म ७३ जना घाइते भएका छन्। घाइतेमध्ये रसुवा जिल्लामा मात्रै ४३ जना रहेका छन्। घाइतेहरूको विभिन्न अस्पताल तथा स्वास्थ्य संस्थामा उपचार भइरहेको जनाइएको छ।
उद्धारतर्फ भने हालसम्म ३ हजार २५३ जनालाई जीवितै उद्धार गरिएको छ। तर, झन्डै एक हजार मानिस अझै सम्पर्कविहीन रहेकाले मृतकको संख्या अझै बढ्न सक्ने र बेपत्ताको अवस्था पत्ता लगाउन थप समय लाग्न सक्ने देखिएको छ।
विशेषगरी रसुवा, नुवाकोट, धादिङलगायत बाढी तथा पहिरो प्रभावित क्षेत्रमा उद्धार टोलीले जोखिम मोलेर खोजी अभियान सञ्चालन गरिरहेका छन्। सडक तथा पुललगायतका भौतिक संरचनामा क्षति पुगेका कारण कतिपय प्रभावित क्षेत्रमा उद्धार तथा राहत सामग्री पुर्याउनसमेत कठिनाइ भइरहेको छ।
विनाशकारी बाढीपछि ठूलो मानवीय क्षति व्यहोरेको मुलुकमा अहिले बेपत्ताको खोजी, शव पहिचान, घाइतेको उपचार तथा प्रभावित नागरिकको सुरक्षित स्थानान्तरण मुख्य प्राथमिकतामा परेको छ। प्रहरीको पछिल्लो तथ्यांकले विपद्को भयावहता अझै गम्भीर रहेको देखाएको छ।
