भारतीय सञ्चारमाध्यम बीबीसी हिन्दीका अनुसार सशस्त्र सीमा बल (एसएसबी) को उद्धार टोलीले नदीमा निगरानी गरिरहेका क्रममा पानीमा शव बगिरहेको देखेपछि मोटरबोटको प्रयोग गरी शवहरू बाहिर निकालेको थियो। बरामद शवहरू सम्बन्धित जिल्ला मुख्यालयमा पठाएर पहिचान प्रक्रिया अघि बढाइएको छ।

महराजगंजको निचलौल तहसीलका उप-जिल्लाधिकारी सिद्धार्थ गुप्ताका अनुसार बिहीबार दिउँसो गण्डक नदीबाट चारवटा शव फेला परेका थिए। तीमध्ये तीन महिला र एक पुरुष रहेका छन्। उनका अनुसार शवहरू ‘अपस्ट्रीम’ अर्थात् नेपालबाट बगेर आएको सम्भावना प्रबल रहेको छ।

गुप्ताले नेपालमा आएको बाढीपछि गण्डक नदीको बहाव अत्यधिक बढेको र त्यही क्रममा शवहरू भारततर्फ आएको हुनसक्ने बताएका छन्। शवको पहिचानका लागि भारतीय अधिकारीहरू नेपाल प्रशासनसँग निरन्तर सम्पर्कमा रहेको पनि उनले बताएका छन्।

यता कुशीनगरमा फेला परेका तीन शवमध्ये दुई महिला र एक पुरुष रहेको कुशीनगरका अतिरिक्त प्रहरी अधीक्षक सिद्धार्थ वर्माले जानकारी दिएका छन्। तीनवटै शवलाई सुरक्षित रूपमा फ्रिजरमा राखिएको र पहिचान गर्ने प्रक्रिया अघि बढाइएको भारतीय अधिकारीहरूले बताएका छन्। अधिकारीहरूले आगामी दिनमा पनि नेपालतर्फबाट बाढीको बहावसँगै थप शव भारततर्फ बगेर आउन सक्ने आशंका व्यक्त गरेका छन्। त्यसलाई ध्यानमा राख्दै गण्डक नदी आसपासका क्षेत्रमा निगरानी तथा उद्धार गतिविधि थप तीव्र पारिएको छ।

नेपालमा बाढीले ठूलो जनधनको क्षति गरिरहेका बेला नदीको तीव्र बहावले विपद्को असर सीमापार भारतसम्म पुर्‍याएको घटनाले बाढीको भयावहता थप स्पष्ट पारेको छ। भारतमा फेला परेका शव नेपाली नागरिककै हुन् वा अन्य क्षेत्रका, भन्ने यकिन भने पहिचान प्रक्रिया पूरा भएपछि मात्र हुने देखिएको छ।