काठमाडौँ । चीनले तिब्बतमा बाढीका कारण प्रभावित तथा बेपत्ता नागरिकको उद्धार कार्य पुनः सुरु गरेको छ। पानी थुनिएर बनेको अस्थायी तालबाट पानीको बहाव तलतिर घटेपछि उद्धार अभियान पुनः सञ्चालनमा ल्याइएको चिनियाँ सरकारी टेलिभिजन सीसीटीभीलाई उद्धृत गर्दै बीबीसीले जनाएको छ।
यसअघि अस्थायी ताल फुटेर बाढीको जोखिम बढेपछि चीनले करिब तीन घण्टाका लागि उद्धार कार्य रोकेको थियो। जोखिम कम भएपछि उद्धार टोली पुनः परिचालन गरिएको हो।
भोटेकोशी नदीमा आएको भीषण बाढीपछि तिब्बतको सीमावर्ती क्षेत्रमा ५५० भन्दा बढी मानिस बेपत्ता रहेको बताइएको छ। बेपत्तामध्ये करिब २६० जना कैलाश मानसरोवर यात्रामा रहेका तीर्थयात्री भएको जनाइएको छ।
बाढीका कारण नदी आसपासका क्षेत्रमा ठूलो क्षति भएपछि चिनियाँ सुरक्षाकर्मी तथा उद्धार टोलीले बेपत्ताको खोजी र प्रभावित नागरिकको उद्धारलाई प्राथमिकतामा राखेका छन्।
अस्थायी तालमा पानीको सतह र बहावमा आएको परिवर्तनलाई निरन्तर निगरानी गर्दै उद्धार कार्य अघि बढाइएको छ। सम्भावित जोखिम पुनः बढ्न सक्ने भएकाले उद्धार टोलीलाई उच्च सतर्कताका साथ परिचालन गरिएको बताइएको छ।
नेपालतर्फ भोटेकोशी बाढीले ठूलो जनधनको क्षति पुर्याइरहेका बेला सीमापार तिब्बतमा समेत सयौँ मानिस बेपत्ता भएको खबरले विपद्को भयावहता थप स्पष्ट पारेको छ।
— एजेन्सी
