काठमाडौँ । भोटेकोशी नदीमा आएको विनाशकारी बाढीले निम्त्याएको मानवीय क्षतिको आँकडा झनै भयावह बन्दै गएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले भदौ १२ गते दिउँसो ३ बजेसम्मको तथ्याङ्क सार्वजनिक गर्दै बाढीबाट हालसम्म ५३८ जनाको मृत्यु भएको जनाएको छ।
प्राधिकरणका अनुसार बाढीको सबैभन्दा ठूलो मानवीय क्षति चितवनमा भएको छ। चितवनमा मात्रै २२१ जनाको मृत्यु भएको छ। त्यस्तै, नवलपरासी पूर्वमा १३४, गोरखामा विभिन्न मानव अंगसहित ४६, नुवाकोटमा ३७ र धादिङमा ३३ जनाको शव फेला परेको छ।
त्यसैगरी तनहुँमा २८, नवलपरासी पश्चिममा २७ र रसुवामा १२ जनाको मृत्यु भएको प्राधिकरणले जनाएको छ। बाढी तथा विपद्का घटनामा परी हालसम्म ७३ जना घाइते भएका छन्। घाइतेमध्ये रसुवामा ४३, नुवाकोटमा २७ र धादिङमा ३ जना रहेका छन्।
९७७ अझै सम्पर्कविहीन
बाढीपछि ठूलो संख्यामा मानिस सम्पर्कविहीन बनेका छन्। प्राधिकरणका अनुसार ९७७ जना अझै सम्पर्कमा आएका छैनन्। सम्पर्कविहीन हुनेमा विदेशी नागरिकको संख्या उल्लेख्य रहेको छ।
तथ्याङ्कअनुसार ५१७ जना विदेशी नागरिक तथा नेपाल भ्रमणमा आएका वा विदेशमा बसोबास गर्ने १२७ जना नेपाली अझै सम्पर्कविहीन छन्। जिल्ला आपत्कालीन कार्य सञ्चालन केन्द्र (डीईओसी) बाट प्राप्त विवरणअनुसार रसुवामा १६१, मकवानपुरमा ६६ र नुवाकोटमा १ जना हराइरहेका छन्।
उद्धारमा खटिएका सुरक्षाकर्मीसमेत बेपत्ता
विपद्को समयमा नागरिकको उद्धार तथा राहतमा खटिएका सुरक्षाकर्मी र कर्मचारीसमेत बाढीको चपेटामा परेका छन्। प्राधिकरणका अनुसार नेपाली सेनाका ४५, नेपाल प्रहरीका २८ र सशस्त्र प्रहरी बलका १३ जना अझै सम्पर्कविहीन छन्।
