काठमाडौँ । त्रिशूली नदीको तीव्र कटानका कारण धादिङको कृष्णभीर क्षेत्रमा पहिरो खस्दा पृथ्वी राजमार्ग अवरुद्ध भएको छ। पहिरो खसेसँगै राजमार्गको दुवैतर्फ सवारी आवागमन ठप्प भएको छ भने काठमाडौँतर्फ आउने तथा जाने सयौँ सवारीसाधन बीच बाटोमै रोकिएका छन्।
काठमाडौँ उपत्यका ट्राफिक कार्यालयका अनुसार त्रिशूली नदीले राजमार्गको सडकखण्ड नै कटान गरेपछि कृष्णभीर क्षेत्रमा पहिरो गएको हो। नदीको कटान र लगातारको वर्षाका कारण सडकको संरचना कमजोर बन्दै गएपछि पहिरो खसेको प्रहरीले जनाएको छ।
कार्यालयका प्रवक्ता नरेशराज सुवेदीले पृथ्वी राजमार्ग अवरुद्ध भएपछि उक्त सडक हुँदै सञ्चालन हुने सवारीसाधनलाई काठमाडौँमै रोकिएको जानकारी दिए। राजमार्गको अवस्था जोखिमपूर्ण रहेकाले तत्कालै नियमित यातायात सञ्चालनमा आउन सक्ने अवस्था नरहेको प्रहरीले जनाएको छ।
काठमाडौँलाई धादिङ, चितवन, पोखरा लगायतका जिल्लासँग जोड्ने प्रमुख सडकका रूपमा रहेको पृथ्वी राजमार्ग अवरुद्ध हुँदा लामो दूरीका यात्रु तथा मालवाहक सवारीसाधन प्रभावित भएका छन्। विशेषगरी वर्षायाममा त्रिशूली नदीको बहाव बढ्दा राजमार्गका विभिन्न स्थानमा कटान तथा पहिरोको जोखिम बढ्दै आएको छ।
लगातारको वर्षासँगै बाढी र पहिरोको जोखिम बढिरहेका बेला प्रहरीले अत्यावश्यक कामबाहेक जोखिमयुक्त सडकखण्डमा यात्रा नगर्न आग्रह गरेको छ। यात्रा गर्नुअघि सम्बन्धित सडकको पछिल्लो अवस्थाबारे जानकारी लिएर मात्र गन्तव्यतर्फ जान तथा पहिरो र नदी कटान भएका क्षेत्रमा विशेष सावधानी अपनाउन प्रहरीले अनुरोध गरेको छ।
कृष्णभीरमा खसेको पहिरो तत्काल हटाएर सडक सञ्चालनमा ल्याउन चुनौती देखिएको छ। वर्षा नरोकिए त्रिशूलीको थप कटानसँगै सडकखण्डमा पुनः पहिरो खस्ने जोखिमसमेत रहेकाले यात्रुहरूलाई सतर्क रहन आग्रह गरिएको छ।
