काठमाडौं । रसुवाको टिमुरेमा बाढीकाे वास्तविक समय अवलोकन तथा निगरानी गर्नका लागि साेमबार सीसीटीभी क्यामेरा जडान गरिएको छ।

नदीको अवस्था निरन्तर निगरानी, पूर्वसूचना प्रणालीलाई थप प्रभावकारी बनाउने तथा सम्भावित जोखिम न्यूनीकरणका लागि टिमुरेमा सीसीटीभी जडान गरिएको हो।

ऊर्जामन्त्री विराजभक्त श्रेष्ठले आइतबार पूर्वसूचना तथा निगरानी प्रणालीलाई थप सुदृढ गर्न निर्देशन दिनुभएकाे थियाे । त्यसपछि सोमबार जलविज्ञान तथा जलस्रोत अनुसन्धान केन्द्रको अगुवाइमा टिमुरेमा वास्तविक समय बाढी निगरानीका लागि सीसीटीभी क्यामेरा जडान गरेको हो।

हाल उक्त प्रणाली सञ्चालनमा ल्याउन भीएसएटी जडान तथा सञ्चार प्रणाली व्यवस्थापनको कार्य भइरहेको छ। सोमबार रातिदेखि नै प्रणाली सञ्चालनमा आएकाे हाे। जसबाट प्राप्त सूचना तथा दृश्यलाई २४ घण्टे बाढी पूर्वानुमान तथा पूर्वसूचना सेवाको नियमित प्रणालीमा एकीकृत गरी चौबिसै घण्टा निगरानी गरिने भएकाे हाे।

विशेषगरी सीमावर्ती क्षेत्रमा नदीको अवस्था, बाढीको सम्भावित जोखिम तथा बाढीजन्य घटनाको प्रारम्भिक पहिचानमा यस प्रणालीले सहयोग पुर्‍याउने भएकाे भएकाे छ। जसबाट समयमै सूचना प्रवाह, पूर्वसूचना तथा जोखिम न्यूनीकरणका कार्यलाई थप प्रभावकारी बनाउन महत्त्वपूर्ण योगदान पुग्ने अपेक्षा गरिएको हाे।