काठमाडौं । रसुवामा आएको विनाशकारी बाढी र पहिरोका कारण ज्यान गुमाउनेको संख्या १ हजार ५८ पुगेको छ। मंगलबार दिउँसो २ बजेसम्म विभिन्न स्थानबाट १ हजार ५८ जनाको शव फेला परेको प्रहरीले जनाएको छ।
प्रहरीका अनुसार फेला परेका शवमध्ये ३० बालक, ३५ बालिका, २३२ महिला र ३७१ पुरुष रहेका छन्। यस्तै, ३९० वटा आंशिक अंग भएका शव फेला परेको विवरणमा उल्लेख छ।
फेला परेका शवमध्ये ९७२ शवको लास जाँच मुचुल्का प्रक्रिया भइरहेको प्रहरीले जनाएको छ। पहिचान खुलेका तथा आवश्यक प्रक्रिया पूरा भएका शवमध्ये ५८ शव आफन्तलाई हस्तान्तरण गरिएको छ।
बाढी तथा पहिरोका कारण ठूलो संख्यामा मानवीय क्षति भएपछि पहिचान खुल्न नसकेका शवको व्यवस्थापन पनि चुनौतीपूर्ण बनेको छ। प्रहरीले पहिचान नखुलेका ६८४ शव जमिनमुनि व्यवस्थापन गरिएको जनाएको छ।
रसुवामा आएको बाढीले ठूलो जनधनको क्षति पुर्याएपछि उद्धार, शव खोजी तथा पहिचानको काम अझै जारी रहेको प्रहरीले जनाएको छ।
