काठमाडौँ । भोटेकोसी नदीमा आएको विनाशकारी बाढीले क्षतिग्रस्त टिमुरे–केरुङ सडक चीनले पुनः सञ्चालनमा ल्याएको छ। बाढीपछि चीनले रातदिन काम गरेर सडक मर्मत तथा पुनःनिर्माण सम्पन्न गरेपछि बुधबार बिहान करिब ८ बजेदेखि आवागमन खुलाइएको चिनियाँ समाचार एजेन्सी सिन्ह्वाले जनाएको छ।
भदौ १० गते आएको बाढीले नेपालतर्फको टिमुरे नाका र चीनतर्फको केरुङ पोर्ट जोड्ने सडक तथा संरचनामा ठूलो क्षति पुर्याएपछि दुई देशबीचको स्थलमार्ग सम्पर्क अवरुद्ध भएको थियो।
सडक खुलेसँगै चिनियाँ उद्धार टोली, राहत सामग्री र आवश्यक उद्धार उपकरण प्रभावित क्षेत्रतर्फ पठाउन थालिएको छ। चिनियाँ उद्धार टोली केरुङ पोर्टसम्म पुगिसकेको जनाइएको छ।
तर, चीनतर्फ सडक सञ्चालनमा आए पनि नेपालतर्फ टिमुरे नाकासम्म पुग्ने सडक अझै सहज भइसकेको छैन। नेपालतर्फको सडक सम्पर्क पनि पुनःस्थापित भएपछि खोजी, उद्धार तथा राहत कार्य थप प्रभावकारी हुने अपेक्षा गरिएको छ।
