नुवाकोट । भोटेकोशी नदीमा आएको भीषण बाढीको ११ दिनपछि नुवाकोटको बेत्रावती बजारबाट ६४ वर्षीया चण्डिका श्रेष्ठलाई जीवितै उद्धार गरिएको छ।
गत १० भदौमा आएको विनाशकारी बाढीपछि सम्पर्कविहीन रहेकी विदुर नगरपालिका–१० निवासी श्रेष्ठ शुक्रबार बेत्रावती बजारस्थित आनन्द श्रेष्ठको घरभित्र अचेत अवस्थामा जीवितै भेटिएकी हुन्।
सशस्त्र प्रहरी बल, नेपालका प्रहरी निरीक्षक सुमन बिकको कमान्डमा खटिएको उद्धार टोलीले उनको उद्धार गरेको हो।
उद्धारपछि श्रेष्ठलाई तत्काल हेलिकप्टरमार्फत त्रिशूलीस्थित नेपाली सेनाको मैबल ब्यारेक ल्याइँदैछ। त्यहाँ प्रारम्भिक उपचार गरिएपछि स्वास्थ्य अवस्थाअनुसार थप उपचारका लागि काठमाडौँ पठाइने उद्धार टोलीले जनाएको छ।
भीषण बाढी आएको ११ दिनसम्म जीवित रहन सफल श्रेष्ठको उद्धारलाई अहिले एक चमत्कारिक घटनाका रूपमा हेरिएको छ।
