काठमाडौं । गोरखाको उत्तरी भेगस्थित चुमनुब्री गाउँपालिका–४ मा गएराति आएको भीषण बाढीले चारवटा घर तथा एउटा मुख्य फलामे पुल बगाएको छ। रातको समयमा लेदोसहित आएको बाढीले बस्तीमा ठूलो क्षति पुर्याए पनि स्थानीयवासी समयमै सुरक्षित स्थानमा पुगेका कारण मानवीय क्षति भने हुन पाएन।
नाम्रुङ खोलामा गएराति करिब ३ बजेतिर अचानक आएको बाढीले स्थानीय नुर्वु ओङ्ग्याल, उर्गेन छयोदेन, लाक्पा भुटी र दोर्जे ग्याल्जेनको घर बगाएको हो।
जिल्ला प्रहरी कार्यालय गोरखाका प्रहरी नायब उपरीक्षक (डिएसपी) राजकुमार श्रेष्ठका अनुसार बाढी आउनुअघि नै स्थानीयवासीले जोखिम महसुस गरी सुरक्षित स्थानतर्फ भाग्न सफल भएका थिए। यसका कारण ठूलो मानवीय क्षति हुनबाट जोगिएको प्रहरीले जनाएको छ।
बाढीले चुमनुब्री गाउँपालिका–४ र वडा नम्बर २ लाई जोड्ने मुख्य फलामे पुलसमेत बगाएको छ। पुल बगेसँगै दुई वडाबीचको आवतजावत प्रभावित भएको छ भने स्थानीयको दैनिक जीवनमा थप कठिनाइ उत्पन्न भएको छ।
हिमाली तथा दुर्गम क्षेत्रमा पर्ने नाम्रुङ क्षेत्रमा आएको यस बाढीले स्थानीय बस्तीको जोखिमलाई पुनः उजागर गरेको छ। रातको समयमा अचानक आएको बाढीका कारण स्थानीय त्रसित बनेका थिए।
यद्यपि, आइतबार बिहानदेखि खोलाको बहाव क्रमशः घट्दै गएको प्रहरीले जनाएको छ। अहिले नाम्रुङ खोलाको अवस्था सामान्य बन्दै गएको छ।
सम्बन्धित निकायले क्षतिको थप विवरण सङ्कलन गर्नुका साथै प्रभावित परिवारको अवस्था र आवश्यक राहत तथा पुनःस्थापनाका विषयमा जानकारी लिइरहेको जनाइएको छ। दुर्गम हिमाली क्षेत्रमा सडक तथा वैकल्पिक पहुँच सीमित भएकाले पुल बग्नु स्थानीयका लागि थप चुनौतीपूर्ण बनेको छ।
