काठमाडौं । विनाशकारी बाढीपहिरोबाट प्रभावित नेपाली नागरिकका लागि पाकिस्तानले १०० टन मानवीय सहायता सामग्री पठाएको छ। विपद्को पीडामा रहेका नेपालीप्रति ऐक्यबद्धता जनाउँदै पाकिस्तानले टेन्ट, कम्बल, म्याट, सरसफाइ सामग्री तथा अत्यावश्यक औषधिसहित ठूलो परिमाणमा राहत सामग्री नेपाल पठाएको हो।
पाकिस्तानी प्रधानमन्त्री शहबाज शरिफको निर्देशनमा राष्ट्रिय विपद् व्यवस्थापन प्राधिकरण (एनडीएमए) को समन्वयमा राहत सामग्री नेपाल पठाइएको पाकिस्तानी विदेश मन्त्रालयले जनाएको छ। सहायता सामग्री बोकेको चार्टर्ड विमान इस्लामाबादबाट काठमाडौंका लागि प्रस्थान गरेको छ।
राहत सामग्री पठाउनुअघि इस्लामाबाद अन्तर्राष्ट्रिय विमानस्थलमा आयोजित कार्यक्रममा पाकिस्तानका संघीयमन्त्री तारिक फजल चौधरी, पाकिस्तानका लागि नेपालकी कार्यवाहक राजदूत रीता धिताल तथा विदेश मन्त्रालय र एनडीएमएका अधिकारीहरूको उपस्थिति रहेको थियो।
पाकिस्तानका उपप्रधानमन्त्री तथा विदेशमन्त्री इशाक डारले विपद्को कठिन घडीमा प्रभावित नेपालीप्रति पाकिस्तानको साथ र ऐक्यबद्धता रहेको उल्लेख गर्दै नेपाललाई आवश्यक सहयोग गर्न पाकिस्तान तयार रहेको बताएका छन्।
यसअघि पाकिस्तानी प्रधानमन्त्री शहबाज शरिफ स्वयं इस्लामाबादस्थित नेपाली दूतावास पुगेर नेपालमा आएको विनाशकारी बाढीबाट भएको जनधनको क्षतिप्रति दुःख व्यक्त गरेका थिए। उनले कार्यवाहक राजदूत रीता धितालसँग भेट गर्दै ज्यान गुमाउनेहरूप्रति गहिरो समवेदना प्रकट गरेका थिए।
विपत्तिले ठूलो मानवीय संकट सिर्जना गरिरहेका बेला पाकिस्तानबाट आएको १०० टन राहत सामग्रीले प्रभावित नेपालीको तत्कालीन राहत तथा पुनःस्थापनामा महत्वपूर्ण सहयोग पुग्ने अपेक्षा गरिएको छ। संकटको घडीमा पाकिस्तानले देखाएको यो मानवीय साथले नेपालप्रति अन्तर्राष्ट्रिय ऐक्यबद्धता थप बलियो बनेको छ।
