काठमाडौं । हिन्दु नारीहरूको प्रमुख पर्व हरितालिका (तीज) आज देशभर श्रद्धा र भक्तिपूर्वक मनाइँदैछ। भाद्र शुक्ल तृतीयाका दिन मनाइने तीजका अवसरमा पशुपतिनाथसहित देशभरका शिव मन्दिरमा महिला भक्तजनको घुइँचो लागेको छ।
तीजको अवसरमा महिलाहरू निराहार तथा फलाहार व्रत बसी भगवान् शिव र पार्वतीको पूजा–आराधना गर्ने गर्छन्। तीजको व्रत तथा उपासना गरेमा सुख, शान्ति, समृद्धि र पारिवारिक कल्याण प्राप्त हुने धार्मिक विश्वास छ।
धार्मिक मान्यताअनुसार सत्ययुगमा हिमालयकी पुत्री पार्वतीले भगवान् शिवलाई पति रूपमा प्राप्त गर्न गौरीघाटमा कठोर तपस्या गरेकी थिइन्। पिता हिमालयले पार्वतीको इच्छाविपरीत भगवान् विष्णुसँग विवाह गरिदिन खोजेपछि उनले आफ्ना साथीहरूसँग समस्या सुनाएकी थिइन्।
पार्वतीको इच्छाअनुसार उनका साथीहरूले उनलाई हरण गरी कसैले नदेख्ने स्थानमा लुकाएर राखे। त्यही स्थानमा पार्वतीले निराहार व्रत र कठोर तपस्या गरी भगवान् शिवलाई प्राप्त गरेको धार्मिक कथन छ। पार्वतीलाई साथीहरूले हरण गरेको दिन भाद्र शुक्ल तृतीया भएकाले यही दिनदेखि हरितालिका तीजको व्रत बस्ने परम्परा सुरु भएको धर्मशास्त्रीय मान्यता छ।
अटल सौभाग्य, सुख–शान्ति तथा पारिवारिक कल्याणको कामनाका साथै सन्तान प्राप्तिका लागि विवाहित महिलाहरू र असल वर प्राप्तिको कामनामा अविवाहित महिलाहरूले समेत तीजको व्रत बस्ने धार्मिक विधान रहेको धर्मशास्त्रका जानकारहरू बताउँछन्।
तीजका अवसरमा आज देशभरका शिवालयमा विशेष पूजा, आराधना तथा दर्शन भइरहेको छ। सरकारले पनि तीज पर्वका अवसरमा महिला कर्मचारीका लागि बिदा दिएको छ।
