काठमाडौं। नेपाली कांग्रेस संसदीय दलका नेता भीष्मराज आङदेम्बेले हरितालिका तिजको अवसरमा स्वदेश तथा विदेशमा रहेका सम्पूर्ण हिन्दु नेपाली दिदीबहिनीहरूमा सुख, शान्ति, समृद्धि, सुस्वास्थ्य तथा दीर्घायुको शुभकामना व्यक्त गरेका छन्।
तिज पर्वको अवसरमा शुभकामना सन्देश जारी गर्दै आङदेम्बेले हरितालिका तिज नेपाली मौलिक संस्कृति, परम्परा र सामाजिक सद्भावसँग जोडिएको महत्वपूर्ण पर्व भएको बताएका छन्। तिजले नेपाली समाजमा आपसी प्रेम, पारिवारिक एकता, सद्भाव र आत्मीयता अभिवृद्धि गर्दै आएको उनको भनाइ छ।
समयसँगै नेपाली समाज परिवर्तन हुँदै गएको उल्लेख गर्दै आङदेम्बेले महिलाको भूमिका अब घरपरिवारमा मात्र सीमित नरहेको बताएका छन्। राष्ट्र निर्माणदेखि राजनीति, अर्थतन्त्र, शिक्षा, स्वास्थ्य, विज्ञान, प्रविधि तथा सामाजिक रूपान्तरणका हरेक क्षेत्रमा नेपाली महिलाको योगदान महत्वपूर्ण रहेको उनले उल्लेख गरेका छन्।
उनले तिजलाई केवल परम्परा र उत्सवका रूपमा मनाउनेभन्दा पनि महिला सम्मान, समान अधिकार, आत्मनिर्भरता र सामाजिक न्यायको सन्देश प्रवाह गर्ने अवसरका रूपमा ग्रहण गर्नुपर्नेमा जोड दिएका छन्।
महिलामाथि हुने हिंसा, विभेद, असमानता र अन्यायको अन्त्य गर्दै समान अवसर र सम्मानजनक जीवनको सुनिश्चितता गर्नु राज्य तथा समाज दुवैको साझा दायित्व भएको आङदेम्बेको भनाइ छ।
तिज पर्वले नेपाली समाजमा आपसी सद्भाव र आत्मीयतालाई थप मजबुत बनाउँदै न्यायपूर्ण, समतामूलक, सभ्य र समृद्ध समाज निर्माणका लागि नयाँ ऊर्जा प्रदान गरोस् भन्ने कामनासमेत उनले गरेका छन्।
