काठमाडौं । सप्तकोशी नदीमा पानीको बहाव तीव्र रूपमा बढ्दै खतराको तहमा पुगेपछि कोशी ब्यारेजका २३ वटा ढोका खोलिएका छन्। ब्यारेज नियन्त्रण कक्षका अनुसार आज बिहान ७ः१५ बजे सप्तकोशीमा पानीको बहाव प्रतिसेकेन्ड १ लाख ८१ हजार ७७५ क्युसेक मापन गरिएको छ। नदीमा पानीको बहाव अझै बढ्दो क्रममा रहेको जनाइएको छ।
जलसतह खतराको बिन्दुमा पुगेपछि स्थानीय प्रशासनले सुनसरी र सप्तरीका कोशी तटीय क्षेत्रका बासिन्दालाई उच्च सतर्कता अपनाउन आग्रह गरेको छ। प्रशासनले नदी आसपासका बासिन्दालाई सुरक्षित रहन, जोखिमपूर्ण क्षेत्रमा नजान तथा आवश्यक परे सुरक्षित स्थानतर्फ सर्न आग्रह गरेको छ।
