काठमाडौँ । प्रधानमन्त्री बालेन्द्र शाहले विजयादशमीको शुभकामना दिँदै भ्रष्टाचार, कुशासन, असमानता र राजनीतिक विकृतिविरुद्ध एकजुट भएर अघि बढ्न सबै नेपालीलाई आह्वान गरेका छन्। विजयादशमीलाई धार्मिक तथा सांस्कृतिक उत्सवमा मात्र सीमित नराखी समाजमा विद्यमान विकृति र विसङ्गति अन्त्य गर्ने अवसरका रूपमा लिनुपर्नेमा उनले जोड दिएका छन्।
विजयादशमीका अवसरमा स्वदेश तथा विदेशमा रहेका सम्पूर्ण नेपालीलाई सुख, शान्ति, समृद्धि र निरन्तर प्रगतिको शुभकामना दिँदै प्रधानमन्त्री शाहले असत्यमाथि सत्यको विजयको सन्देशलाई व्यवहारमा उतार्न आग्रह गरेका हुन्।
सामाजिक सञ्जाल फेसबुकमार्फत शुभकामना सन्देश जारी गर्दै उनले पौराणिक मान्यताअनुसार विजयादशमीकै दिन दुर्गा भवानीले महिषासुरजस्तो आसुरी शक्तिलाई पराजित गरेको र भगवान् रामले रावणको अन्त्य गरेको प्रसङ्ग उल्लेख गरेका छन्। यी धार्मिक कथाले खराब प्रवृत्तिमाथि असल कर्म र सकारात्मक सोचको विजय हुने सन्देश दिने उनको भनाइ छ।
प्रधानमन्त्री शाहले दसैँमा मान्यजनबाट दुर्गा भवानीको प्रसादस्वरूप टीका, जमरा र आशीर्वाद ग्रहण गर्ने परम्पराले पारिवारिक सम्बन्धलाई आत्मीय बनाउनुका साथै जीवनमा असल काम गर्न प्रेरणा दिने बताएका छन्। टाढा रहेका आफन्त तथा मान्यजनसँग भेटघाट गरी खुसी साटासाट गर्ने परम्पराले पनि पर्वको सामाजिक महत्त्व बढाएको उनले उल्लेख गरेका छन्।
विकृति अन्त्य गर्न सोच र व्यवहारमा परिवर्तन आवश्यक
प्रधानमन्त्री शाहले समाजमा जरा गाडेका विकृति अन्त्य गर्न प्रत्येक नागरिकले आफ्नो सोच र व्यवहारमा सुधार ल्याउनुपर्ने बताएका छन्। अहंकार, लोभ, ईर्ष्या, हिंसा र विभेदजस्ता नकारात्मक प्रवृत्ति त्याग्दै इमानदारी, जिम्मेवारी र सकारात्मक सोचलाई आत्मसात् गर्नुपर्ने उनको सन्देश छ।
भ्रष्टाचार, कुशासन, ढिलासुस्ती, असमानता र राजनीतिक विकृति अन्त्य गर्न सामूहिक प्रयास आवश्यक रहेको उल्लेख गर्दै उनले दृढ अठोट, इमानदार प्रयास र साझा प्रतिबद्धताबाट मात्रै अपेक्षित परिवर्तन सम्भव हुने बताएका छन्।
प्रत्येक नागरिकले सरकार आफ्नो साथमा रहेको अनुभूति गर्न सक्ने अवस्था निर्माण गर्नु आवश्यक रहेको उनको भनाइ छ। त्यसका लागि राज्यका निकाय र नागरिक सबैले आ–आफ्नो जिम्मेवारी इमानदारीपूर्वक पूरा गर्नुपर्ने सन्देश प्रधानमन्त्री शाहले दिएका छन्।
विविधताबीच राष्ट्रिय एकता र सद्भावको सन्देश
भौगोलिक, भाषिक र सांस्कृतिक विविधताले भरिएको नेपाली समाजमा विजयादशमीले सबै जाति, समुदाय, वर्ग र क्षेत्रका नागरिकलाई एकताको सूत्रमा बाँध्ने विश्वास प्रधानमन्त्री शाहले व्यक्त गरेका छन्।
दसैँले लामो समयदेखि भेटघाट हुन नसकेका साथीभाइ तथा आफन्तसँग पुनर्मिलन गर्ने, आपसी आत्मीयता बढाउने र सामाजिक सम्बन्धलाई थप बलियो बनाउने अवसर प्रदान गर्ने उनले बताएका छन्। सबै नेपालीले आफ्नो अवस्था र क्षमताअनुसार पर्व मनाउँदै आपसी सम्मान, माया, सद्भाव र एकताको भावना अभिवृद्धि गर्नुपर्नेमा उनले जोड दिएका छन्।
प्रधानमन्त्री शाहका अनुसार विजयादशमीको सार खराब प्रवृत्तिको अन्त्य, असल आचरणको प्रवर्द्धन र सामूहिक प्रयासमार्फत समुन्नत समाज निर्माण गर्नु हो। पर्वले दिने सत्य, न्याय र सकारात्मक परिवर्तनको सन्देशलाई व्यवहारमा उतार्न सके मात्रै यसको वास्तविक महत्त्व स्थापित हुने उनको सन्देश छ।
