काठमाडौं । राष्ट्रिय स्वतन्त्र पार्टीका सभापति रवि लामिछानेले पुराना पार्टी र आफूहरू उस्तै नभएको जिकिर गरेका छन्।
शनिबार पार्टीको ललितपुर महानगर भेलामा बोल्दै उनले उस्तै भए घुस प्रकरणमा मुछिएका सांसदलाई जोगाउनतिर लाग्ने बताए।
‘एउटा काण्डमा हामीले सांसदलाई कारबाही गर्दा कतिपयले नयाँ पार्टी पनि उस्तै त रहेछ नि, भनेको सुनियो। उस्तै होइन। उस्तै भइदिएको भए त हामी जोगाउन, संरक्षण गर्नतिर लाग्थ्यौं नि हामीले त घण्टा गनेर कारबाही गरेर देखायौं’, लामिछानेले भने, ‘त्यसैले अरू पुराना पार्टीसँग हामीलाई तुलना नगर्नु होला।’
मेडिकल व्यवसायीसँग पार्टीलाई तिर्नुपर्ने भन्दै २ करोड पैसा मागेको अडियो सार्वजनिक भएपछि रास्वपाले ढाकाकुमार श्रेष्ठलाई सांसद र साधारण सदस्यसमेत नरहनेगरी कारबाही गरेको थियो ।
