बुटवल । तिलोत्तमा चक्रपथमा चलाउने गरी अघि बढेको ट्राम रेलका लागि रेल मार्गको काम अघि बढाउनुपर्नेमा तिलोत्तमाका क्रियाशील ६ दलले सहमति जनाएका छन् । यसअघि केही स्थानीयले रेल मार्गको काममा अवरोध गरेका थिए । गत मंगलबार बसेको सर्वदलीय वैठकमा नगरपालिकाका प्रमुख रामकृष्ण खाँणले तिलोत्तमा रेल्वे परियोजना नगरपालिकाको गौरवको आयोजना भएकाले कुनै बहानामा अवरोध स्वीकार्य नहुने बताए । उनले तिलोत्तमा रेल मार्गको काम अब अघि बढ्ने र नगरपालिकाको तर्फबाट साथ रहने प्रतिवद्धचा जनाए।
नेपाली काँग्रेस, एमाले, माओवादी केन्द्र, राष्ट्रिय प्रजातन्त्र पार्टी, राष्ट्रिय जनमुक्ति पार्टी र जनता समाजवादी पार्टीका नेताहरु, वडा नं १ का अध्यक्ष फर्सुराम गिरी, वडा न–२ का अध्यक्ष डिलबहादुर भट्टराई लगायतले रेल मार्गमा अवरोध गर्न नहुने तर्क गरे । यस्तै शंकरनगर साुमदायिक वन उपभोक्ता समूहले पनि ४३ फुट सडक कायम गर्न वनले स्वीकृति दिने प्रतिवद्धता जनाएको तिलोत्तमा पब्लिक रेल वे कम्पनीका प्रबन्ध निर्देशक भोला शर्माले बताए ।
‘शर्माले भने, नगरप्रमुख ज्यु सहित नगरभित्रका ६ वटा प्रमुख राजनीतिक दल, शंकरनगर सामुदायिक वन सहित सरोकारवाला सबैले रेल मार्ग अघि बढाउन सहयोग गर्ने प्रतिवद्धता जनाउनु भएको छ अब काम अघि बढ्छ’– रेल सञ्चालनमा आएपछि तिलोत्तमाको पहिचान थप उचो हुने र नगरवासीहरु सुपथ शुल्कमा यात्रा गर्न र सामान ढुवानीमा सहजता आउँछ ।
तत्कालीन मेयर वासुदेव घिमिरेको पालामा भएको लगानी सम्मेलनमा यो परियोजना छनोट भएको थियो । नगरपालिकाले पब्लिक कम्पनी मोडेलमा अघि बढाएपछि प्रदेश सरकारले समेत सहयोग गरेको थियो । कुल ८ अर्ब लागतमा नगरभित्र ५० किलोमिटरको दुरीमा रेल सेवा सञ्चालन गर्न प्रदेश र नगरपालिकाबाट ५१ प्रतिशत र जनताबाट बाँकी लगानी हुने बताईएको छ ।
चक्रपथको ४३ फिट भित्री बाटोको छेउमा जोडेर १४ फिट भागमा ट्राम रेल सञ्चालन गरिनेछ । तिलोत्तमा पब्लिक रेल्वे कम्पनी लिमिटेडका अध्यक्ष हरि तिवारीले समुदाय, स्थानीय पालिका र एडीबीलगायत दातृ निकायहरूको सहयोगमा परियोजना चलाउन लागेको बताए । रेल्वेका प्रबन्ध निर्देशक भोला शर्माले विविध कारणले एक वर्ष ढिलाई भएको बताए । स्रोत पहिचान गरी आवश्यक पहल अगाडि बढाइएको उनले बताए । यो विद्युतबाट चल्ने र ७० जना चढ्न मिल्ने लाइट रेल्वे भएको उनले जानकारी दिए ।
रेल सेवामा दैनिक ३० हजार, मासिक ८ लाख र वर्षमा १ करोडले अवलोबन भ्रमण गर्ने त्यसबाहेक सामान ढुवानीलगायतको समेत सेवा दिन सकिने बताए । यसबाट वार्षिक १ अर्ब १० करोड आम्दानी गर्ने र खर्च कटाएर १ अर्ब बचत हुने प्रबन्ध निर्देशक भोला शर्माको दाबी छ । परियोजना सुरु भएपछि एकसय जना कर्मचारीले रोजगार पाउने जनाईएको छन् ।
