बझाङ । बझाङमा सुदुरपश्चिम प्रदेश सरकारका मन्त्री सवार गाडी दुर्घटनामा परेको छ । सुदुरपश्चिम सरकारका आन्तरिक मामिला तथा कानुन मन्त्री पृथ्वी बहादुर सिंह सवार सु.प.प्र ०१००१ झ ४८० नम्बरको डडेल्धुराबाट गृहजिल्ला चैनपुर जाने क्रममा केदारस्युँ गाउँपालिकाको धारछडा भन्ने ठाउँमा सडकबाट करिव ५० मिटर तल कालंगा खोला किनारमा खसेर दुर्घटना ग्रस्त भएको मन्त्रीका प्रेस सल्लाहकार ललित सिंहले जनाएका छन् । 

दुर्घटनामा परि मन्त्री सिंह सहित ४ जना घाइते भएका छन् । गाडीका सवार मन्त्री सिंहकी श्रीमती, भाउजु, पिएसो र ड्राईभर घाईते भएको सल्लाहकार सिंहले बताएका छन् । उनका अनुसार मन्त्री सिंहसहित श्रीमति र भाउजुको अवस्था गम्भीर रहेको जानकारी दिएका छन् । मन्त्री सिंहको केदारस्युँ गाउँपालिका १ देउरास्थित ॠतु पोलिक्लिनिकमा र अन्य ३ जनाको रायल प्राथमिक स्वास्थ केन्द्र देउरामा उपचार भइरहेको र थप उपचारका लागि हेलिकोप्टर मार्फत लैजाने तयारी रहेको बझाङ प्रहरीले जनाएको छ।