बाँके । तीस करोड रुपैयाँ लागतमा निर्माण भएको बाँकेको कोहलपुरस्थित अत्याधुनिक सुविधा सम्पन्न बसपार्क चारपटक टेण्डर आह्वान गर्दा पनि कुनै व्यवसायीले सञ्चालनका लागि रुचि देखाएका छैनन् । मासिक दुई लाखसम्मको भाडा महंगो भएको व्यवसायीहरुको भनाई छ । आर्थिक मन्दीका कारण व्यापार व्यवसाय नचलेको बेला महंगो भाडा तिरेर बसपार्क सञ्चालन गर्न नसकिने उनीहरुको भनाई छ । बसपार्क सञ्चालनका लागि कोहलपुर नगर विकास समितिले पटक–पटक टेण्डर आह्वान गरेको भएपनि तर कुनै व्यवसायीले तयार नभएको पाईएको छ।

‘चौथो पटक ग्लोवल टेण्डर आह्वान गर्दा पनि ठेक्का लाग्न नसकेको कोहलपुर नगरपालिकाका प्रमुख प्रशासकिय अधिकृत टिकाराम ढकालले बताएका छन् । टेण्डर सकिन केहि दिन बाँकी रहेको उनले बताए । कोहलपुर नगर समितिले झण्डै ३० करोड लागतमा लामो दुरीको बसपार्क निर्माण गरेको हो । नगर बिकास कोष मार्फत झण्डै २० करोड ऋण र १० करोड नगर बिकास समितिको लगानीमा निर्माण सम्पन्न भई गत चैत्र महिनामा पहिलो पटक टेण्डर आह्वान गरिएको थियो । समग्र व्यवस्थापन प्रबेश, टिकट काउन्टर, शौचालय र पार्किङ शुल्क भन्दै मुल्य अभिवृद्धि कर बाहेक प्रतिबर्ष न्युनतम मुल्य ९६ लाख ८६ हजार ४ सय राखेर टेण्डर आह्वान गरिएको थियो । तर पनि टेण्डर प्रक्रियामा जान सकेको छैन् ।

कोहलपुर–११ मा छोटो दुरीको बसपार्क बागेश्वरी यातायात प्रालिले टेण्डरमा सञ्चालन गरिरहेको छ । मासिक झण्डै २ लाख भाडा तिर्ने गरि सो बसपार्क सञ्चालनमा आएको हो । बागेश्वरी यातायात प्रालिका महासचिव टंक बस्यालले टेण्डर रकम बढि भएकाले व्यवसायीले हातहाल्ने अवस्था नरहेको बताए । उनले एक बसपार्क सञ्चालन भईरहेको अवस्थामा अर्को बसपार्क सञ्चालन हुने अवस्था समेत नरहेको बताए । ३ बर्ष अघि मात्रै करोडौको लागतमा निर्मित छोटो दुरीको बसपार्क सञ्चालनमा छ । कोहलपुरका एक स्थानिय भन्छन्, करोडौंको बसपार्क अहिले टिकटक बनाउने पार्क बनेको छ । उनले दैनिक युवायुवतीहरु समाजिक सञ्जालमा टिकटक बनाउनै भिड हुने गरेको बताए ।