ओखलढुंगा । ओखलढुंगाको चम्पादेवी गाउँपालिकामा पहिरो जाँदा एकै परिवारको तीन जनाको मृत्यु भएको छ। विराटनगरस्थित कोशी प्रदेश प्रहरी कार्यालयका अनुसार गाउपालिका ८ मा पहिरो जाँदा ३६ वर्षीय रणबहादुर गुरूङसहित उनको परिवारका सदस्यको मृत्यु भएको हो।

शुक्रबार बिहान भएको घटनामा गुरूङसहित उनको २९ वर्षीया श्रीमती शिवमाया गुरूङ, १८ वर्षीया छोरी दिपीका गुरूङको घटनास्थलमा शव फेला परेको प्रहरी कार्यालयका सूचना अधिकारी एवम् प्रहरी उपरिक्षक ऋषिराम कँडेलले जानकारी दिए। प्रहरी उपरिक्षक कँडेलका अनुसार पहिरोले गुरूङको घर समेत बगाएको छ। यसक्रममा गुरूङको १० वर्षीय छोरा दिनेश गुरूङ बेपत्ता अवस्थामा रहेको कँडेलले जानकारी दिए।

प्रहरी कार्यालयका अनुसार पहिरोले गुरूङको नजिकमा रहेको बलबहादुर गुरूङ र जरसिंह गुरूङको दुइवटा घर बगाएको छ। यद्यपी दुवै जनाको ९ जनाको परिवार सकुशल रहेको प्रहरीले जनाएको छ। घटनास्थल सदरमुकाम ओखलढुंगा बजारबाट करिब ७५ किलोमिटर टाढा डाँडामा भएको हो।