लन्डन । बेलायतमा १४ वर्षपछि विपक्षी लेबर पार्टी ठूलो बहुमतका साथ सत्तामा जाने निश्चित देखिएको छ ।
सुरुआती नतिजाअनुसार लेबर पार्टीले १५१ भन्दा बढी सिट जितिसकेको छ । वर्तमान प्रधानमन्त्री ऋषि सुनकको कन्जरभेटिभ पार्टी २३ सिटमा विजयी भएको छ ।
अब बेलायतमा लेबर पार्टीका नेता किएर स्टार्मर प्रधानमन्त्री बन्ने लगभग निश्चित छ । स्टार्मर सन् २०२० मा जर्मी कोर्बिनको स्थानमा लेबर पार्टीका नेता चुनिएका थिए ।
बिहीबारको चुनावलगत्तै गरिएको ‘एक्जिट पोल’ले ६५० सदस्यीय तल्लो सदनमा लेबर पार्टीले ४१० सिट जित्ने देखाएको थियो । कन्जरभेटिभ पार्टीले १३१ सिट मात्र जित्ने अनुमान छ ।
२०१९ मा भएको निर्वाचनमा कन्जरभेटिभले ३६४ सिट जितेको थियो । त्यति बेला विपक्षी लेबर पार्टीको सिट संख्या केवल २०३ थियो । एक्जिट पोलको रिपोर्ट सही साबित भएमा स्टार्मर ४१० सांसदका साथ प्रधानमन्त्री बन्नेछन् ।
१९९७ को टोनी ब्लेयरको ऐतिहासिक जितभन्दा यो थोरै मात्र कम हो । त्यति बेला लेबर पार्टीले ४१९ सिट जितेको थियो । कन्जरभेटिभले १६५ सिट जितेको थियो ।
