काठमाडौं । नेपाली कांग्रेसको १५औँ महाधिवेशनबाट निर्वाचित नयाँ केन्द्रीय कार्यसमितिले औपचारिक वैधानिकता अद्यावधिक गर्ने प्रक्रिया अघि बढाएको छ। महामन्त्री प्रदीप पौडेलसहितको टोली सोमबार निर्वाचन आयोग पुगेर नवनिर्वाचित कार्यसमितिको विवरण बुझाएसँगै कांग्रेसको नयाँ नेतृत्वले संस्थागत प्रक्रियामा प्रवेश गरेको छ।
महामन्त्री पौडेलले निर्वाचन आयोगका सचिव कृष्णप्रसाद काप्रीलाई राजनीतिक दलसम्बन्धी ऐनको दफा ५१ अनुसार केन्द्रीय कार्यसमितिको विवरण हस्तान्तरण गरेका हुन्।
कार्यसमितिको विवरणसँगै पार्टीको संशोधित विधान, महाधिवेशनबाट पारित समसामयिक राजनीतिक दस्तावेज तथा महाधिवेशनका निर्णयसमेत आयोगमा बुझाइएको छ।
यसअघि गत बिहीबार शपथग्रहण समारोहपछि बसेको केन्द्रीय कार्यसमिति बैठकले महाधिवेशनबाट निर्वाचित नयाँ कार्यसमितिको विवरण अद्यावधिक गर्ने जिम्मेवारी कार्यवाहक मुख्य सचिव दुलाललाई दिएको थियो।
नयाँ नेतृत्व चयनसँगै कांग्रेसले अब संगठनात्मक पुनर्संरचना, आन्तरिक एकता, विधानको प्रभावकारी कार्यान्वयन र राजनीतिक जिम्मेवारी निर्वाहको चरणमा प्रवेश गरेको छ। निर्वाचन आयोगमा विवरण अद्यावधिक गर्ने प्रक्रिया त्यसैको महत्त्वपूर्ण संस्थागत कदमका रूपमा हेरिएको छ।
महाधिवेशनबाट प्राप्त जनादेशलाई व्यवहारमा रूपान्तरण गर्दै पार्टीलाई गुटगत सीमाभन्दा माथि उठाएर विधि, विधान र सामूहिक नेतृत्वका आधारमा अघि बढाउनु नयाँ कार्यसमितिका लागि मुख्य चुनौती हुनेछ।
