काठमाडौं । अनुरा कुमारा दिसानायकेले श्रीलंकाको नयाँ राष्ट्रपतिको शपथ लिएका छन् ।
आइतबार निर्वाचन आयोगले उनलाई विजेता घोषित गरेको थियो । कोलम्बोस्थित राष्ट्रपति कार्यालय भवनमा सोमबार बिहान उनले शपथ लिएका हुन् ।
उनले श्रीलंकाले भोगिरहेको समस्याको जटिलता आफूले बुझेको र जनताको आशा पूरा गरी उनीहरूको विश्वास जित्न कडा मेहनत गर्ने वाचा गरे ।
जेभीपी पार्टीका ५५ वर्षीय दिसानायकेले नेसनल पिपुल्स पावर नामक गठबन्धन बनाएर चुनावमा भाग लिएका थिए । उनले ४२.३१ प्रतिशत मत प्राप्त गरेका थिए । भ्रष्टाचार निवारण गर्ने र श्रीलंकाको राजनीति शुद्धीकरण गर्ने वाचाका साथ उनी चुनावमा उठेका थिए ।
श्रीलंकामा अहिले अन्तर्राष्ट्रिय मुद्राकोषको सहायतामा स्थिति केही सुधार भएको छ । तर, मितव्ययिताका कडा सर्त पालना गर्दा गरिब जनताले ठूलो आर्थिक कठिनाइ बेहोर्नु परिरहेको छ ।
