बुटवल । नेपाली काँग्रेसका नेता डा. शेखर कोइरालाले मुलुकलाई युवाहरु नै मिलेर बनाउनुपर्ने बताएका छन् ।
नेपालका युवाहरुले विश्वका सफल मुलुक बनाई सकेको उल्लेख गर्दै मुलुकमा सुशासन कायम भएमा युवाहरुले स्वदेशमै रोजगार सृजना गर्ने र मुलुकलाई समृद्ध बनाउने बताए । युवालाई देशमै वस्ने बातावरण मिलाउन जोड रहेको बताए ।
नेपाली काँग्रेस केन्द्रीय सुचना, संचार तथा प्रचार विभागले आइतबार बुटवलमा गरेको "राष्ट्र निर्माणमा युवाको योगदान तथ्यमा आधारित प्रचार अभियान" विषयक कार्यक्रम उद्घाटन गर्दै उनले राजनीतिमा इमानको आवश्यकता रहेको बताए ।
प्रतिनिधि सभा सदस्य समेत रहेका कोइरालाले नेपालमा केही हुँदैन भन्ने सोचलाई बदल्न जरुरी रहेको भन्दै ‘हामी नेपाली हो, हामी बनाउछौ नेपाल भन्ने सोच राख्न जरुरी छ ।’ त्यसको निम्ती हामीले सुशासन दिन सक्नुपर्छ ।’ युवाहरुलाई उद्यमशिल बनाउनु पर्ने उल्लेख गर्दै युवालाई सम्भावनाको बाटो कोरिदिन सरकारको ध्यानाकर्षण गराए । काँग्रेसका विभागहरुले नागरिकको चिन्ता बुझ्ने काम गर्नुपर्ने बताए । उनले काँग्रेसलाई असफल हुने छुट नभएको जिकिर गर्दै त्यतातिर सबै जिम्मेवार बन्न आग्रह गरे ।
कार्यक्रममा पुर्वगृहमन्त्री तथा कांग्रेसका नेता बालकृष्ण खाँणले समयकै मितिमा महाधिवेशन हुने बताए । उनले काँग्रेसले संविधान र विधानको ब्यवस्थालाई कहिले उलंघन गर्न नसक्ने भएकाले विधानत पार्टिको महाधिवेशन समयमानै हुने ठोकुवा गरे ।
उनले प्रजातान्त्रिक पद्दतीमा सत्ताको हस्तान्तरण गरिने पार्टी काँग्रेस मात्र भएकाले तोकिएकै मितिमा नेतृत्व परिवर्तनका लागि महाधिवेशन हुने स्पष्ट पार्नुभयो । अहिलेको परिस्थितीमा मुलुकलाई निकास दिने नेतृत्व आवश्यक परेको बताए ।
कार्यक्रममा विभिन्न तहका नेताहरुले धारणा राखेका थिए । साथै नेपाली काँग्रेस केन्द्रीय सुचना, संचार तथा प्रचार विभागका संयोजक मिन बिश्वकर्माले कार्यक्रमका बारेमा बताएका थिए । उक्त कार्यक्रमको अध्यक्षता विभागीय सदस्य कमला पाण्डेले गरेकी थिइन ।
