काठमाडौँ । मन्त्रिपरिषद्को बुधवार बसेको बैठकले संक्रमणकालीन न्यायसम्बन्धी दुई आयोगलाई पूर्णता दिएको छ ।
सत्य निरुपण तथा मेलमिलाप आयोगको अध्यक्षमा महेशकुमार थापा (संखुवासभा) नियुक्त भएका छन् । आयोगका सदस्यहरूमा अच्युतप्रसाद भण्डारी (जाजरकोट), डा.टीकाप्रसाद ढकाल (पाँचथर), पदमबहादुर शाही (जुम्ला) र कुमारी कौशल्या ओझा (कञ्चनपुर) रहेका छन् ।
यस्तै, बेपत्ता पारिएका व्यक्तिको छानबिन आयोगको अध्यक्षमा पूर्वमुख्यसचिव लिलादेवी गड्तौला नियुक्त भएकी छिन् । यस आयोगका सदस्यहरूमा गोपाल नाथ योगी (सल्यान), अग्नीप्रसाद थपलिया (झापा), सृजना पोख्रेल (काठमाडौँ) र बिनिता नेपाली (कास्की) रहेका छन् । पूर्वप्रधानन्यायाधीश ओमप्रकाश मिश्र नेतृत्वको सिफारिस समितिको सिफारिसलाई मन्त्रिपरिषद्ले अनुमोदन गरेको हो ।
यसैगरी, सरकारले गभर्नर सिफारिस समितिको पुनर्गठन गरेको छ । उपप्रधान तथा अर्थमन्त्री विष्णुप्रसाद पौडेल संयोजक रहेको समितिमा निवर्तमान गभर्नर महाप्रसाद अधिकारी र अर्थविद् डा. पोषराज पाण्डेलाई सदस्य बनाएर पुनर्गठन गरेको बैठकपछि सञ्चारमन्त्री पृथ्वीसुब्बा गुरुङले जानकारी दिए । डा. विश्व पौडेलको राजीनामापछि पुनर्गठन गरिएको यो समितिबाट यसअघि डा. विजयनाथ भट्टराईले पनि राजीनामा दिएका थिए ।
साथै, मन्त्रिपरिषद्ले सहसचिव शोभाकान्त पौडेललाई सचिवमा बढुवा गरेको छ । संस्कृति, पर्यटन तथा नागरिक उड्डयन मन्त्रालयका सचिव विनोदप्रकाश सिंह ५८ वर्षे उमेरहदका कारण गत बुधबार अनिवार्य अवकाशमा गएपछि रिक्त सचिव पदमा पौडेललाई बढुवा गरिएको एक मन्त्रीले जानकारी दिए ।
