काठमाडौं । रुसको पूर्वी तटीय क्षेत्र कमचटका प्रायद्वीप नजिक ८.८ म्याग्निच्युडको शक्तिशाली भूकम्प गएको छ। अमेरिकी भूगर्भ सर्वे (यूएसजिएस) का अनुसार भूकम्पको केन्द्र पेट्रोपावलोव्स्कबाट करिब १३७ किलोमिटर पूर्व र सतहदेखि १९ किलोमिटर गहिराइमा रहेको छ ।
भूकम्पपछि प्रशान्त महासागरको तटीय क्षेत्रलाई लक्षित गर्दै जापान, रुस तथा अलास्कामा खतरनाक सुनामीको चेतावनी जारी गरिएको छ। यूएसजिएसका अनुसार आगामी तीन घण्टाभित्र ती क्षेत्रमा सुनामीको जोखिम उच्च छ ।
जापानको मौसम विज्ञान एजेन्सीले पनि ३.३ फिटसम्मको लहर आउन सक्ने भन्दै सतर्कता अपनाउन आग्रह गरेको छ। सुरुवातमा भूकम्पको परिमाण ८.० मापन गरिएको थियो तर पछिल्लो संशोधनअनुसार ८.८ म्याग्निच्युडको पुष्टि गरिएको छ ।
स्थानीय अधिकारीहरूका अनुसार पछिल्ला दशकमा यो क्षेत्रमै आएको यो सबैभन्दा शक्तिशाली भूकम्प हो। यद्यपि हालसम्म मानवीय वा भौतिक क्षतिको विवरण प्राप्त भइसकेको छैन ।
