वेलिङटन । न्युजिल्याण्डकी एक २७ वर्षीया महिला आइतबार बसमा यात्रा गरिरहेको अवस्थामा बच्चामाथि दुव्र्यवहार र बेवास्ता गरेको आरोपमा पक्राउ परेकी छन् । डिटेक्टिभ इन्स्पेक्टर सिमोन ह्यारिसनका अनुसार ती महिलाले दुई वर्षीया बालिकालाई झोलाभित्र राखेर बसको सामान राख्ने कम्पार्टमेन्टमा राखेकी थिइन् । अकल्याण्डबाट करिब १०० किलोमिटर उत्तरमा पर्ने काइवाकास्थित बस डिपोमा चालकले झोलाभित्र केही हलचल महसुस गरेपछि प्रहरीलाई खबर गरेका थिए ।
प्रहरीको उपस्थितिमा झोला खोल्दा एक बालिका भित्र रहेको देखिएको ह्यारिसनले जानकारी दिइन् । "सानी केटी आत्तिएको अवस्थामा थिई, वातावरण अत्यधिक तातो भए पनि उनको शारीरिक अवस्था सामान्य रहेको पाइएको छ," उनले भनिन् । बालिकालाई तत्काल अस्पताल लगेर विस्तृत स्वास्थ्य परीक्षण गरिएको छ । घटनापछि बालबालिका मन्त्री ओरंगा तामरिकीलाई जानकारी दिइएको छ भने मुद्दाको थप अनुसन्धान जारी रहेको जनाइएको छ ।
