काठमाडौँ । समाजवादी गणतन्त्र भियतनामकी उपराष्ट्रपति भो थि आन सुआन तीनदिने औपचारिक नेपाल भ्रमण सम्पन्न गरी मध्यरात स्वदेश फर्किएकी छन् । उनी उपराष्ट्रपति रामसहायप्रसाद यादवको मैत्रीपूर्ण निमन्त्रणामा नेपाल आएको भदौ ७ गते काठमाडौं आएकी थिइन् ।
स्वदेश फर्किँदा त्रिभुवन अन्तर्राष्ट्रिय विमानस्थलको अतिविशिष्ट कक्षमा संस्कृति, पर्यटन तथा नागरिक उड्डयनमन्त्री बद्रीप्रसाद पाण्डे, परराष्ट्र सचिव अमृतबहादुर राईलगायत उच्च पदस्थ अधिकारीहरूले उपराष्ट्रपति सुआनलाई बिदाइ गरेका थिए । यस अवसरमा नेपाली सेनाले प्रदान गरेको ‘गार्ड अफ अनर’ निरीक्षणसमेत उनले गरेकी थिइन् ।
भ्रमणका क्रममा उपराष्ट्रपति सुआनले राष्ट्रपति रामचन्द्र पौडेलसँग शिष्टाचार भेटवार्ता गरिन् भने उपराष्ट्रपति यादवसँग प्रतिनिधिमण्डलस्तरीय वार्ता सम्पन्न गरिन् । यस्तै, उनले प्रधानमन्त्री केपी शर्मा ओली र परराष्ट्रमन्त्री डा. आरजु राणा देउवासँग पनि भेटवार्ता गरेकी थिइन् ।
नेपाल र भियतनामबीच कूटनीतिक सम्बन्ध स्थापना भएको ५०औँ वर्षगाँठका अवसरमा सम्पन्न यो भ्रमणलाई दुवै देशले विशेष महत्वका साथ हेरेका छन् । भियतनामतर्फबाट नेपालको यो पहिलो उच्चस्तरीय भ्रमण भएको जनाइएको छ ।
