बुटवल । नेपाली कांग्रेसका तर्फबाट रुपन्देही क्षेत्र नम्बर–३ मा प्रतिनिधिसभा सदस्यका उम्मेदवार बनेका सुशील गुरुङ निर्वाचन प्रतिस्पर्धामा केवल उम्मेदवारका रूपमा होइन, जितका प्रबल दाबेदारका रूपमा उभिएका छन् । तीन दशकभन्दा लामो राजनीतिक संघर्ष, संगठन निर्माणको अनुभव र निरन्तर सामाजिक सेवाले उनको उम्मेदवारीलाई मतदातामाझ भरोसायोग्य बनाएको छ ।
२०५१ सालमा नेपाल विद्यार्थी संघको साधारण सदस्यबाट राजनीतिक यात्रा सुरु गरेका गुरुङ २०५४ मा भैरहवा बहुमुखी क्याम्पस इकाइ अध्यक्ष बनेपछि विद्यार्थी राजनीतिमा स्थापित भए । स्ववियु उपसaभापति, सभापति हुँदै स्ववियु परिषद् केन्द्रीय समितिको सह–सचिवसम्म पुग्दा उनले नेतृत्व क्षमता, संगठन विस्तार र नीति निर्माणमा आफूलाई प्रमाणित गरिसकेका छन् । २०६१ मा नेविसंघ रुपन्देही अध्यक्ष बनेका गुरुङ २०६२/०६३ को दोस्रो जनआन्दोलनमा अग्रपंक्तिमा रहेर लोकतन्त्र पुनःस्थापनाको संघर्षमा सक्रिय भूमिका निर्वाह गरे ।
लोकतन्त्रका लागि सडकदेखि संगठनसम्मको उनको योगदान आज पनि कार्यकर्तामाझ प्रेरणाको स्रोत बनेको छ । पार्टी राजनीतिमा पनि उनको निरन्तरता र विश्वासिलो नेतृत्व स्पष्ट देखिन्छ । नेपाली कांग्रेसको १२औँ र १३औँ महाधिवेशनबाट क्षेत्रीय सचिव तथा १४औँ महाधिवेशनबाट क्षेत्रीय सभापति निर्वाचित गुरुङले संगठन सुदृढीकरण, कार्यकर्ता परिचालन र जनसम्पर्क विस्तारलाई प्राथमिकता दिँदै कांग्रेसलाई रुपन्देही–३ मा मजबुत बनाएका छन् ।
राजनीतिसँगै सामाजिक सेवामा उनको योगदान झनै प्रभावशाली छ । रेडक्रस, रक्त सञ्चार सेवा, जेसीआई र लायन्स क्लबमार्फत आपतकालीन सेवा, रक्तदान अभियान, युवा नेतृत्व विकास र सामुदायिक सेवामा उनले देखाएको सक्रियता स्थानीयस्तरमै अनुभूत गरिएको छ । शिक्षा क्षेत्रमा विद्यालय व्यवस्थापन समिति र नगरपालिका शिक्षा समितिमा रहेर उनले सामुदायिक विद्यालयको गुणस्तर सुधारमा खेलेको भूमिका उल्लेखनीय मानिन्छ ।
दीर्घ अनुभव, संगठनात्मक क्षमता र सेवाभावको बलियो संगम बोकेका सुशील गुरुङ विकास, शिक्षा, स्वास्थ्य र सुशासनलाई प्राथमिकतामा राख्ने इमानदार र परिणाममुखी नेताका रूपमा स्थापित छन् । यही कारण कांग्रेस कार्यकर्तामात्र होइन, आम मतदातामाझ पनि उनको उम्मेदवारीप्रति बढ्दो विश्वास देखिएको छ ।
स्थानीय तहमा गहिरो पकड, संगठनको एकढिक्का समर्थन र जनतासँगको प्रत्यक्ष सम्बन्धका कारण रुपन्देही–३ मा सुशील गुरुङको जित लगभग सुनिश्चितजस्तै देखिन थालेको राजनीतिक विश्लेषकहरूको ठम्याइ छ । यसपटकको निर्वाचनमा रुपन्देही–३ ले अनुभव, निष्ठा र परिणाम दिन सक्ने नेतृत्व रोज्ने संकेत स्पष्ट देखिन थालेको छ ।
