अर्घाखाँची - आगामी फागुन २१ गते हुने प्रतिनिधिसभा निर्वाचन नजिकिँदै जाँदा अर्घाखाँचीमा नेपाली कांग्रेसका उम्मेदवार विष्णु प्रसाद खनाल प्रति जनसमर्थन उत्साहजनक रूपमा बढ्दै गएको छ ।
जिल्लाको मालारानी गाउँपालिका–४ निवासी तथा नेपाली कांग्रेस लुम्बिनी प्रदेश सह–महामन्त्री खनाललाई परिवर्तन र स्थिर नेतृत्वको प्रतीकका रूपमा मतदाताले हेर्न थालेका छन् ।
लामो समयदेखि जिल्ला राजनीतिमा सक्रिय खनाल अखण्ड लुम्बिनी अभियान, स्थानीय तह सुदृढीकरण र विभिन्न सामाजिक अभियानमार्फत जनतामाझ भिजेको अनुहारका रूपमा परिचित छन् ।
संगठन निर्माण, कार्यकर्तासँगको निरन्तर संवाद र विकासप्रतिको स्पष्ट दृष्टिकोणले उनलाई अन्य प्रतिस्पर्धीभन्दा फरक बनाएको कांग्रेस नेताहरूको दाबी छ । गत निर्वाचनमा अत्यन्त झिनो मतान्तरले पछि परेको कांग्रेस यसपटक संगठनात्मक एकता, उत्साहित युवा पंक्ति र परिवर्तनको चाहनाले थप बलियो बनेको छ ।
मालारानी गाउँपालिकासहित जिल्लाका विभिन्न क्षेत्रमा घरदैलो, भेटघाट र अन्तरक्रिया कार्यक्रम तीव्र पारिएको छ । कार्यक्रममा देखिएको जनउपस्थिति र सकारात्मक प्रतिक्रिया कांग्रेसका लागि शुभ संकेत मानिएको छ ।
राजनीतिक विश्लेषकहरूका अनुसार यसपटक अर्घाखाँचीमा पुराना समीकरण फेरिने सम्भावना बलियो देखिएको छ । विगतमा व्यक्तिकेन्द्रित मतका आधारमा परिणाम प्रभावित भएको सन्दर्भमा अहिले भने पार्टीको एजेण्डा, विकास दृष्टि र स्वच्छ छविलाई मतदाताले प्राथमिकता दिन थालेका छन् ।
खनालले आफू निर्वाचित भए अर्घाखाँचीलाई कृषि, पर्यटन र पूर्वाधार विकासको केन्द्रका रूपमा अघि बढाउने प्रतिबद्धता जनाएका छन् । “यो निर्वाचन केवल जित–हारको विषय होइन, अर्घाखाँचीको भविष्य निर्माणको अभियान हो,” उनले हालैको कार्यक्रममा बताएका छन् ।
जिल्लामा बढ्दो चुनावी सरगर्मीबीच कांग्रेस कार्यकर्तामा उत्साह र मतदातामा आशा देखिँदा अर्घाखाँचीमा यसपटक कांग्रेसको जित सम्भव रहेको आँकलन गर्न थालिएको छ । फागुन २१ को परिणामले जिल्लाको नयाँ राजनीतिक दिशा तय गर्ने निश्चित छ ।
