कराकस । दक्षिण अमेरिकी राष्ट्र भेनेजुएलामा गएको शक्तिशाली दोहोरो भूकम्पले ठूलो मानवीय क्षति निम्त्याएको आशंका गरिएको छ। प्रारम्भिक विवरणअनुसार करिब १० हजार जनाले ज्यान गुमाएको अनुमान गरिएको छ भने हजारौं मानिस घाइते तथा बेपत्ता भएका छन्।
बीबीसीका अनुसार अमेरिकी भौगर्भिक सर्वेक्षण संस्था (यूएसजीएस) ले भेनेजुएलामा ७.२ र ७.५ म्याग्निट्युडका दुई शक्तिशाली भूकम्प गएको पुष्टि गरेको छ। पहिलो भूकम्प गएको केवल ३९ सेकेन्डपछि दोस्रो र अझ शक्तिशाली भूकम्प आएपछि व्यापक विनाश भएको हो।
स्थानीय समयअनुसार साँझ ६ बजे राजधानी कराकसको पश्चिमी क्षेत्रमा केन्द्रबिन्दु बनाएर भूकम्प गएको थियो। साँझको समय भएकाले अधिकांश नागरिक घरभित्रै रहेकाले मानवीय क्षति अत्यधिक भएको अनुमान गरिएको छ।
भूकम्पपछि कार्यवाहक राष्ट्रपति डेल्सी रोड्रिगेजले देशभर संकटकाल घोषणा गरेकी छन्। उद्धार तथा राहत कार्यलाई तीव्रता दिन सेना र आपतकालीन निकायहरू परिचालन गरिएको छ। देशको प्रमुख अन्तर्राष्ट्रिय विमानस्थलसमेत बन्द गरिएको छ भने विद्युत् र इन्टरनेट सेवा गम्भीर रूपमा प्रभावित भएको छ।
विपत्तिप्रति प्रतिक्रिया जनाउँदै अमेरिकी राष्ट्रपति डोनल्ड ट्रम्पले भेनेजुएलाका जनताप्रति समवेदना व्यक्त गरेका छन्। सामाजिक सञ्जाल ‘ट्रूथ सोशल’ मार्फत उनले भूकम्पले डरलाग्दो मानवीय क्षति पुर्याएको उल्लेख गर्दै अमेरिका सहयोग गर्न पूर्ण रूपमा तयार रहेको बताएका छन्।
राष्ट्रपति ट्रम्पले आफ्नो प्रशासनका सबै निकायलाई आवश्यक मानवीय सहायता उपलब्ध गराउन निर्देशन दिइसकेको जनाएका छन्। अमेरिकी विदेशमन्त्री मार्को रुबिओले तत्काल खोज तथा उद्धार टोली, औषधि र राहत सामग्री भेनेजुएला पठाइने जानकारी दिएका छन्।
भूकम्पको शक्तिशाली झट्का छिमेकी देश कोलम्बियाको राजधानीसम्म महसुस गरिएको बताइएको छ। उद्धार कार्य जारी रहेकाले मृतक र घाइतेको संख्या अझ बढ्न सक्ने अधिकारीहरूले बताएका छन्।
भेनेजुएलाको इतिहासकै सबैभन्दा विनाशकारी प्राकृतिक विपत्तिमध्ये एक मानिएको यस घटनाले सम्पूर्ण राष्ट्रलाई शोकमा डुबाएको छ।
