बुटवल । बुटवलमा धर्म, ज्योतिष तथा वास्तु सम्मेलन सुरु भएको छ ।
बिश्व ज्योतिष महासंघ, लुम्बिनी प्रदेशको आयोजनामा बुटवलमा सुरु भएको सम्मेलनलाई कार्यक्रमका प्रमुख अतिथि मुक्तिनाथ धामका संरक्षक ब्रह्मनिष्ठ सन्तशिरोमणी १००८ स्वामी लोकानन्द महाराजले उद्घाटन गर्नुभएकाे हाे ।
विश्वमा ज्योतिष विद्याको महत्व र आकर्षण बढ्दै गएको सम्मेलनमा सहभागी वक्ताले बताउनु भएको छ । अध्ययनका धेरै विषयमध्ये जुनसुकै विषयको मूल विद्याको श्रोतका रुपमा ज्योतिष विद्या भएकोले यसको महत्व र आकर्षण बढेको सरोकारवाला बताउँछन ।
हिन्दु धर्मावलम्बीहरुले मान्ने आसौच, ज्योतिषशास्त्र र वास्तुशास्त्रका विषयमा देखिएका विविध अन्यौलतालाई चिर्न भन्दै पहिलो पटक बुटवलमा भएको धर्म, ज्योतिष तथा वास्तु सम्मेलनमा बोल्ने वक्ताहरुले सो कुरामा जोड दिएका हुन् ।
मुक्तिनाथ धामका संरक्षक ब्रह्मनिष्ठ सन्तशिरोमणी १००८ स्वामी लोकानन्द महाराजले ज्ञानको सागरमा दर्शन र स्नान हुने अवसरका रुपमा कार्यक्रम महत्वपूर्ण भएको बताउनुभयो । धर्मसभा आफैमा पूर्ण हुने भन्दै उहाँले ज्योतिषलाई चिन्न र मनन गर्न ब्यवहारमा लागु गर्न सुझाव दिनुभयो ।
कार्यक्रममा चैतन्य कृष्ण, प्रमुख वक्ता देवमणी भट्टराई, विश्व ज्योतिष महासंघका केन्द्रीय अध्यक्ष लोकराज पौडेल, वरिष्ठ पत्रकार डां बालकृष्ण चापागाई समाजसेवी टंक पराजुलीले विश्वमा नै फलित ज्योतिषले मानिसहरुको भूत, वर्तमान र भविष्य बताउने हुँदा त्रिकालदर्शी मानिने दाबी गर्नुभयो । कार्यक्रममा प्रमुख वक्ता देवमणी भट्टराईले ज्योतिष परामर्श केन्द्र वास्तवमा रिसर्च सेन्टर भएको बताउनुभयो ।
सम्मेलनबाट निष्कर्ष निकालेर घोषणापत्र समेत जारी गरिने र मुखपत्रका रुपमा पुस्तक प्रकाशन गरिने विश्व ज्योतिष महासंघ लुम्बिनी प्रदेशका अध्यक्ष जनार्दन न्यौपानेले बताउनुभयो ।
हिन्दु धर्मावलम्बीहरुले मान्ने आशौच, ज्योतिषशास्त्र र वास्तुका विषयमा देखिएका विविध अन्यौलतालाई चिर्ने र निचोड निकाल्ने गरी कार्यक्रम गरिएको नेपाल ज्योतिष परिषद केन्द्रीय सदस्य एवं सम्मेलन ब्यवस्थापक सुन्दर भण्डारीले बताउनुभयो । कार्यक्रममा करिब ५ सय सहभागी रहेको थियो ।
सम्मेलनमा देश तथा बिदेशका हिन्दु धर्म अनुयायीहरुको उपस्थिति रहेको छ । विश्व ज्योतिष महासंघ लुम्बिनी प्रदेशको आयोजना तथा लुम्बिनी पुजा सामग्री भण्डार सहआयोजनामा बुटवलमा दुई दिने सम्मेलन चल्नेछ ।
