काठमाडौं । सत्तारुढ राष्ट्रिय स्वतन्त्र पार्टी (रास्वपा)का सांसद खगेन्द्र सुनारले नेपाल प्रहरीका महानिरीक्षक दानबहादुर कार्कीलाई तत्काल पदबाट बर्खास्त गरी उनीमाथि छानबिन गर्न सरकारसँग माग गरेका छन्।
शुक्रबार प्रतिनिधिसभाको बैठकमा बोल्दै सांसद सुनारले सामान्य आरोपकै आधारमा तीन जना मन्त्री बर्खास्त भइसकेको अवस्थामा प्रहरी महानिरीक्षक कार्कीमाथि गम्भीर भ्रष्टाचारका आरोप सार्वजनिक हुँदा पनि सरकारले कारबाही नगरेको भन्दै प्रश्न उठाए।
उनले महानिरीक्षक कार्की, उनकी श्रीमती तथा अन्य उच्च अधिकारीहरूमाथि करोडौँ रुपैयाँ भ्रष्टाचार गरेको आरोपमा अख्तियार दुरुपयोग अनुसन्धान आयोगदेखि सार्वजनिक लेखा समितिसम्म उजुरी परेको दाबी गरे। प्रहरीका तल्लो तहका कर्मचारीका लागि खरिद गरिने जुत्ता, मोजालगायतका सामग्रीमा समेत अनियमितता गरेको आरोप कार्कीमाथि लागेको उनले बताए।
‘करोडौँ करोड भ्रष्टाचार गरेको आरोप लागेको छ। अख्तियारदेखि सार्वजनिक लेखा समितिसम्म उजुरीको चाङ लागेको छ। तल्लो दर्जाका प्रहरीहरूको जुत्ता, मोजा खाइदिएको आरोपसमेत लागेको छ,’ सुनारले संसद्मा भने।
उनले यति गम्भीर आरोप लागिसक्दा पनि सरकारले महानिरीक्षक कार्कीलाई किन बर्खास्त नगरेको भन्दै सरकारसँग जवाफ मागे। साथै, उनीमाथि छानबिन अघि बढाउन ढिलाइ गर्नुको कारणसमेत स्पष्ट पार्न सरकारको ध्यानाकर्षण गराए।
‘यो सरकार कार्कीलाई बर्खास्त किन गरिरहेको छैन ? उनीमाथि छानबिन किन भइरहेको छैन ? के कारणले उनलाई बचाइराखिएको छ ?’ उनले प्रश्न गरे।
सांसद सुनारले सार्वजनिक पदमा रहेका व्यक्तिमाथि लाग्ने भ्रष्टाचारका आरोपलाई गम्भीर रूपमा लिनुपर्ने भन्दै आरोपको निष्पक्ष छानबिनमार्फत सत्यतथ्य बाहिर ल्याउनुपर्नेमा जोड दिए।
