काठमाडौं । राष्ट्रिय स्वतन्त्र पार्टी (रास्वपा)की सांसद आशिका तामाङले मुलुकमा देखिएको एलपी ग्यास अभावप्रति सरकारको गम्भीर ध्यानाकर्षण गराएकी छन्। शुक्रबार प्रतिनिधिसभाको बैठकमा बोल्दै सांसद तामाङले ग्यास अभावको गुनासो लिएर आफूलाई दैनिक हजारौँ फोन आउने गरेको बताइन्। बजारमा ग्यास सिलिन्डर उपलब्ध हुँदाहुँदै पनि कतिपय व्यवसायीले उपभोक्तालाई बिक्री गर्न नमानेको गुनासो आउने गरेको उनको भनाइ छ।
ग्यासको अभावका कारण सर्वसाधारणले सास्ती खेपिरहेको अवस्थामा बजारमा सिलिन्डर हुँदाहुँदै बिक्री नगर्ने प्रवृत्तिप्रति उनले आपत्ति जनाइन्। सरकारको उपस्थितिमाथि नै प्रश्न उठाउँदै उनले ग्यास आपूर्तिमा देखिएको समस्या तत्काल समाधान गर्नुपर्नेमा जोड दिइन्।
‘यो त लासामा सुन छ, कान मेरो बुच्चै छ जस्तो भएन र सभामुख महोदय ?’ भन्दै उनले बजारमा ग्यास हुँदाहुँदै पनि उपभोक्ताले नपाउने अवस्थाप्रति व्यंग्य गरिन्।
उनले सरकारभन्दा बजारमा माफियाको प्रभाव ठूलो भएको हो कि भन्ने प्रश्नसमेत उठाइन्।
‘के यो देशमा सरकारभन्दा ठूलो माफिया नै हो त ? यसको जवाफ यस सदनको सबैभन्दा नजिकको व्यक्तित्व सभामुखज्यूबाट नै पाउनेछु भनेर आशा गरेको छु,’ उनले भनिन्।
सांसद तामाङले ग्यासको कृत्रिम अभाव, बिक्रीमा देखिएको मनोमानी तथा सम्भावित कालोबजारी नियन्त्रणका लागि सरकार गम्भीर रूपमा प्रस्तुत हुनुपर्ने बताइन्। उनले उपभोक्ताले सहज रूपमा ग्यास पाउने वातावरण तत्काल सुनिश्चित गर्न सरकारको ध्यानाकर्षण गराएकी छन्।
