काठमाडौं । परराष्ट्रमन्त्री शिशिर खनालले नेपालको भूमि कुनै पनि छिमेकी मुलुकविरुद्ध प्रयोग हुन नदिने स्पष्ट प्रतिबद्धता व्यक्त गरेका छन्। नेपाल ‘एक चीन’ सिद्धान्तप्रति दृढ रहेको उल्लेख गर्दै उनले छिमेकीसँगको सम्बन्ध आपसी सम्मान, विश्वास र सहकार्यका आधारमा अघि बढाइने बताएका छन्।
शनिबार काठमाडौंमा फाउन्डेसन फर पिस डेभलपमेन्ट एन्ड सोसलिजमले आयोजना गरेको ‘काष्ठमण्डप डायलग’ कार्यक्रममा बोल्दै मन्त्री खनालले नेपालको परराष्ट्र नीतिमा छिमेकीको सुरक्षा संवेदनशीलतालाई पनि महत्व दिइने बताए।
विपद्को कठिन समयमा चीन सरकारले उपलब्ध गराएको आपत्कालीन सहायता तथा प्राविधिक सहयोगप्रति आभार व्यक्त गर्दै उनले जलवायु परिवर्तनका कारण बढिरहेका प्राकृतिक विपद् सामना गर्न क्षेत्रीय सहकार्य अपरिहार्य रहेको बताए। विशेषगरी हिमताल विस्फोट तथा अन्य प्राकृतिक प्रकोपबाट हुन सक्ने क्षति न्यूनीकरणका लागि रियल–टाइम स्याटेलाइट डेटा आदानप्रदान, संयुक्त मौसम पूर्वानुमान तथा प्रभावकारी पूर्वसूचना प्रणाली विकास गर्नुपर्नेमा उनले जोड दिए।
परराष्ट्रमन्त्री खनालले नेपाल–चीनबीचको आर्थिक तथा व्यापारिक सहकार्यलाई अझ व्यावहारिक र परिणाममुखी बनाउनुपर्ने धारणा पनि राखे। नेपाली चिया, कफी तथा जडीबुटीजस्ता उच्च सम्भावना भएका उत्पादनलाई विशाल चिनियाँ बजारमा सहज पहुँच दिलाउन नेपालमै अन्तर्राष्ट्रियस्तरको क्वारेन्टाइन तथा प्रमाणीकरण प्रयोगशाला स्थापना गर्न प्राविधिक सहकार्य आवश्यक रहेको उनको भनाइ थियो।
उनले राजनीतिक तथा कूटनीतिक सम्बन्धसँगै विपद् व्यवस्थापन, प्रविधि, कृषि तथा व्यापारका क्षेत्रमा नेपाल–चीन सहकार्य विस्तार गर्न सकिए दुवै देशका जनताले प्रत्यक्ष लाभ पाउने विश्वास व्यक्त गरे।
