काठमाडौं । हरितालिका तीजका अवसरमा आराध्यदेव भगवान् पशुपतिनाथको दर्शन गर्न बिहानैदेखि पशुपति क्षेत्रमा भक्तजनको ठूलो भीड लागेको छ।
व्रत बसेका महिलासहित दर्शनार्थीको सहजताका लागि पशुपतिनाथ मन्दिरका चारवटै ढोका बिहान ३ बजेदेखि खुला गरिएको पशुपति क्षेत्र विकास कोषले जनाएको छ। भक्तजनलाई सहज र व्यवस्थित रूपमा दर्शन गराउन विभिन्न स्थानबाट छुट्टाछुट्टै लाम तथा प्रवेश–निकासको व्यवस्था मिलाइएको छ।
मित्रपार्क, जयवागेश्वरी, सिनामंगल–एयरपोर्ट र पिंगलास्थानतर्फबाट आउने भक्तजनका लागि अलग-अलग प्रवेशमार्ग तय गरिएको छ। दर्शनार्थीलाई विभिन्न र्याम्प तथा आकासे पुल हुँदै मन्दिरका उत्तर, पश्चिम, पूर्व र दक्षिणतर्फका मुहारबाट दर्शन गराएर बाहिरिने व्यवस्था गरिएको कोषका सदस्य सचिव तीर्थ श्रेष्ठले जानकारी दिए।
भक्तजनको सुरक्षा तथा व्यवस्थापनका लागि पशुपति क्षेत्रमा चार हजार सुरक्षाकर्मी परिचालन गरिएको छ। त्यस्तै, धार्मिक तथा सामाजिक गरी २४ वटा संस्थाका ८५५ जना स्वयंसेवक समेत खटाइएको कोषले जनाएको छ।
तीजको मुख्य दिन भएकाले बिहानैदेखि पशुपति क्षेत्रमा महिलाको उल्लेख्य उपस्थिति देखिएको छ। भक्तजनको भीडलाई व्यवस्थित गर्न सुरक्षा निकाय, स्वयंसेवक तथा कोषका कर्मचारी परिचालन गरिएको छ।
