काठमाडौँ । नेपाल विद्युत प्राधिकरणका नवनियुक्त कार्यकारी निर्देशक दीर्घायु कुमार श्रेष्ठले पद तथा गोपनीयताको शपथ लिएका छन्। ऊर्जा, जलस्रोत तथा सिँचाइ मन्त्री विराजभक्त श्रेष्ठले बुधबार बिहान मन्त्रालयमा कार्यकारी निर्देशक श्रेष्ठलाई शपथ ग्रहण गराएका हुन्।
शपथ ग्रहण कार्यक्रममा मन्त्री श्रेष्ठले प्राधिकरणको कामलाई प्रभावकारी बनाउन प्रणाली निर्माण गरी निष्ठापूर्वक काम गर्न निर्देशन दिए। उनले मन्त्रालयअन्तर्गतका विभिन्न निकायसँग उच्चस्तरको समन्वय कायम गर्दै अघि बढ्न पनि सुझाव दिए।
मन्त्रिपरिषद्को असोज २ गते शुक्रबार बसेको बैठकले दीर्घायु कुमार श्रेष्ठलाई नेपाल विद्युत प्राधिकरणको कार्यकारी निर्देशकमा नियुक्त गर्ने निर्णय गरेको थियो।
नवनियुक्त कार्यकारी निर्देशक श्रेष्ठले शपथ लिएसँगै प्राधिकरणको नेतृत्व सम्हालेका छन्। ऊर्जा क्षेत्रको व्यवस्थापन, सेवा प्रवाह तथा प्राधिकरणका आगामी कार्ययोजनालाई प्रभावकारी रूपमा अघि बढाउने जिम्मेवारी अब उनको काँधमा आएको छ।
