काठमाडौँ । संयुक्त राष्ट्रसङ्घको ८१औँ महासभामा नेपालको प्रतिनिधित्व गर्दै अमेरिका पुगेका परराष्ट्रमन्त्री शिशिर खनाल स्वदेश फर्किएका छन् ।
महासभा तथा त्यसअन्तर्गत आयोजित विभिन्न उच्चस्तरीय कार्यक्रम, द्विपक्षीय भेटवार्ता र छलफलमा सहभागी भएर मन्त्री खनाल बुधबार बिहान काठमाडौँ आइपुगेका हुन् । उनी महासभामा सहभागी हुन असोज ४ गते संयुक्त राज्य अमेरिकाको न्युयोर्क प्रस्थान गरेका थिए ।
भ्रमणका क्रममा मन्त्री खनालले नेपालका तर्फबाट ‘सगरमाथादेखि समुद्रसम्मः जलवायु उत्थानशील भविष्यका लागि आवश्यक कार्यको आह्वान’ विषयक जलवायु केन्द्रित उच्चस्तरीय विशेष कार्यक्रम आयोजना गरेका थिए । उक्त कार्यक्रममार्फत नेपालले जलवायु परिवर्तनका कारण हिमालदेखि समुद्रसम्म परेको प्रभाव तथा जलवायु उत्थानशील भविष्य निर्माणका लागि आवश्यक अन्तरराष्ट्रिय सहकार्यको विषयलाई प्राथमिकताका साथ उठाएको थियो ।
महासभाकै अवसरमा मन्त्री खनालले विभिन्न मुलुकका आफ्ना समकक्षीसँग द्विपक्षीय भेटवार्ता गर्दै नेपालका प्राथमिकता, आपसी हित तथा साझा चासोका विषयमा छलफल गरेका थिए । विभिन्न उच्चस्तरीय कार्यक्रममा नेपालको सहभागितामार्फत अन्तरराष्ट्रिय समुदायसमक्ष नेपालको दृष्टिकोण र प्राथमिकता प्रस्तुत गर्ने अवसरसमेत प्राप्त भएको थियो ।
परराष्ट्र मन्त्रालयका अनुसार महासभामा नेपालको सक्रिय सहभागिता, उच्चस्तरीय भेटवार्ता तथा द्विपक्षीय छलफलले नेपालको अन्तरराष्ट्रिय सम्बन्धलाई थप सुदृढ बनाउन योगदान पुगेको छ । मन्त्री खनालको भ्रमणबाट अन्तरराष्ट्रिय मञ्चमा नेपालको उपस्थिति, चासो र प्राथमिकतालाई प्रभावकारी रूपमा प्रस्तुत गर्न महत्वपूर्ण भूमिका खेलेको बताइएको छ ।
