काठमाडौं । श्रम संस्कृति पार्टीका सांसद ध्रुवराज राईले बिहीबार प्रतिनिधिसभाको बैठकमा निकै छोटो र रोचक शैलीमा सम्बोधन गरेका छन्।
विशेष समयमा बोल्ने क्रममा सांसद राईले सभामुखतर्फ संकेत गर्दै भने, ‘सभामुख महोदय, कुरा त्यही हो हजुर, धन्यवाद।’ यति भनेपछि उनी आफ्नो सिटमा बसेका थिए।
राईको छोटो सम्बोधनपछि सभामुखसहित प्रतिनिधिसभाका सांसदहरू हाँसेका थिए।
यसअघि मंगलबारको बैठकमा भने सांसद राईले प्रधानमन्त्री बालेन्द्र शाह संसद्मा उपस्थित भएर सांसदहरूले उठाएका प्रश्नको जवाफ कहिले दिने भन्दै सरकारको ध्यानाकर्षण गराएका थिए।
आकस्मिक समयमा बोल्दै उनले सभामुखमार्फत सरकार र सरकार प्रमुखले पूरा गर्नुपर्ने जिम्मेवारीबारे प्रश्न उठाएका थिए। ‘सरकार र सरकार प्रमुखले दिनुपर्ने जिम्मेवारी कहिले पूरा हुन्छ ?’ भन्दै उनले यसअघि उठाइएको विषयको जवाफ अहिलेसम्म नआएको बताएका थिए।
