वासिङ्टन । अमेरिकी राष्ट्रपति डोनाल्ड ट्रम्पको व्यापार नीतिका कारण अमेरिकाको गाडी उद्योगमा उत्पादन र लगानी बढाउने वातावरण बनेको बताइएको छ । आयातित गाडीमा लगाइएको २५ प्रतिशत शुल्कपछि जनरल मोटर्स, टोयोटा, फोर्डलगायतका प्रमुख कम्पनीले अमेरिकास्थित कारखानाको क्षमता विस्तार तथा विदेशमा भइरहेको केही उत्पादन स्वदेशमै ल्याउने योजना अघि बढाएका छन् ।
गाडी उद्योगकी विश्लेषक स्टेफनी ब्रिन्लीका अनुसार आयात शुल्कबाट अमेरिकी गाडी उद्योगका केही क्षेत्रमा सकारात्मक प्रभाव देखिएको छ । तर, व्यापार नीतिमा भइरहेका निरन्तर परिवर्तन र अनिश्चितताका कारण कम्पनीहरूले दीर्घकालीन लगानीका निर्णयमा सावधानी अपनाइरहेका छन् ।
अमेरिका–क्यानडा व्यापारसम्बन्धी छलफलले पनि उत्तर अमेरिकी गाडी उद्योगमा थप अन्योल सिर्जना गरेको छ । होन्डाले उत्तर अमेरिकामा रहेका आफ्ना कारखाना उच्च क्षमतामा सञ्चालन भइरहेको जनाएको छ भने भविष्यमा नयाँ कारखाना निर्माण गर्ने सम्भावनाबारे समेत अध्ययन गरिरहेको जनाएको छ ।
आयात शुल्कसँगै विद्युतीय गाडीसम्बन्धी सरकारी नीतिमा भएका परिवर्तनको प्रभाव गाडीका पार्टपुर्जा उत्पादन गर्ने उद्योगमा पनि परेको बताइएको छ । अमेरिकामा यस क्षेत्रमा करिब ९ लाख ३० हजार मानिस कार्यरत छन् ।
अमेरिकी श्रम तथ्याङ्कअनुसार सन् २०२६ को सेप्टेम्बरमा गाडी उद्योगमा करिब १८ लाख मानिस कार्यरत थिए । रोजगारी र उत्पादनमा सुधारका संकेत देखिए पनि आगामी दिनमा व्यापार नीति, लगानीको वातावरण र बजारको मागले अमेरिकी गाडी उद्योगको दिशा निर्धारण गर्ने देखिएको छ । रासस
