काठमाडौं । राष्ट्रिय वाणिज्य बैंकले ३ अर्ब रुपैयाँ बराबरको ऋणपत्र निष्कासन गर्ने भएको छ। बैंकले असोज २९ गतेदेखि ‘६ प्रतिशत आरबिबिएल डिबेञ्चर २०८९’ नामक ऋणपत्र बिक्री खुला गर्न लागेको हो।
बैंकले प्रतिऋणपत्र १ हजार रुपैयाँ अंकित मूल्य कायम गरी ७ वर्ष अवधिको ऋणपत्र निष्कासन गर्न लागेको हो। उक्त ऋणपत्रमा लगानीकर्ताले वार्षिक ६ प्रतिशत ब्याजदर प्राप्त गर्नेछन्।
बैंकले कुल ३० लाख कित्ता ऋणपत्र निष्कासन गर्न लागेको हो। त्यसमध्ये ६० प्रतिशत अर्थात् १८ लाख कित्ता बराबरको १ अर्ब ८० करोड रुपैयाँको ऋणपत्र व्यक्तिगत तवरबाट बाँडफाँट गरिनेछ।
बाँकी ४० प्रतिशत अर्थात् १२ लाख कित्ता ऋणपत्र सर्वसाधारणका लागि छुट्याइएको छ। सर्वसाधारणतर्फ छुट्याइएको ऋणपत्रमध्ये ५ प्रतिशत अर्थात् ६० हजार कित्ता सामूहिक लगानी कोषहरूका लागि सुरक्षित गरिएको बिक्री प्रबन्धक कुमारी क्यापिटल लिमिटेडले जनाएको छ।
ऋणपत्रमा लगानी गर्न इच्छुक सर्वसाधारणले न्यूनतम २५ कित्ताका लागि आवेदन दिनुपर्नेछ। अधिकतम भने निष्कासनमा ल्याइएको सम्पूर्ण कित्ताका लागि आवेदन दिन सकिने व्यवस्था गरिएको छ।
ऋणपत्रको निष्कासन छिटोमा कात्तिक १० गते बन्द हुनेछ। सो अवधिसम्म मागअनुसार आवेदन नपरेमा ढिलोमा कात्तिक १२ गतेसम्म आवेदन दिन सकिनेछ।
वार्षिक ६ प्रतिशत ब्याजदर र ७ वर्षको अवधिसहित राष्ट्रिय वाणिज्य बैंकले ल्याउन लागेको यो ऋणपत्रले स्थिर प्रतिफल खोज्ने लगानीकर्ताका लागि दीर्घकालीन लगानीको अर्को विकल्प थप गर्नेछ।
