क्यानबेरा । अस्ट्रेलियाको नयाँ सवारीसाधन बजारमा विद्युतीय सवारीसाधन (ईभी) को प्रभाव तीव्र रूपमा बढ्दै गएको छ। उपभोक्ताको रोजाइ विद्युतीय प्रविधितर्फ मोडिँदा पेट्रोल तथा डिजेलबाट चल्ने नयाँ सवारीसाधनको बिक्रीमा उल्लेख्य गिरावट आएको छ।

फेडरल चेम्बर अफ अटोमोटिभ इन्डस्ट्रिज (एफसीएआई) का अनुसार सन् २०२६ को सेप्टेम्बरमा अस्ट्रेलियामा पेट्रोल सवारीसाधनको बिक्री अघिल्लो वर्षको सोही महिनाको तुलनामा ३६.२ प्रतिशतले घटेको छ। त्यस्तै, डिजेल सवारीसाधनको बिक्री पनि १८.४ प्रतिशतले कमी आएको छ।

तर, यही अवधिमा ब्याट्रीबाट चल्ने विद्युतीय सवारीसाधन (बीईभी) र प्लग–इन हाइब्रिड सवारीसाधनको बिक्री भने दोब्बरभन्दा बढी भएको छ। यसले अस्ट्रेलियाको अटोमोबाइल बजार परम्परागत इन्धनबाट विद्युतीय तथा विद्युतीकृत प्रविधितर्फ तीव्र गतिमा रूपान्तरण भइरहेको संकेत गरेको छ।

सेप्टेम्बरमा बिक्री भएका कुल नयाँ सवारीसाधनमध्ये बीईभीको बजार हिस्सा २४.२ प्रतिशत पुगेको एफसीएआईले जनाएको छ। यो अस्ट्रेलियामा बीईभीले हासिल गरेको अहिलेसम्मकै दोस्रो उच्च बजार हिस्सा हो। यसअघि अगस्टमा बीईभीको हिस्सा २४.९ प्रतिशत पुगेको थियो।

बीईभीले लगातार पाँचौँ महिनासम्म नयाँ सवारीसाधन बिक्रीमा कम्तीमा २० प्रतिशत बजार हिस्सा कायम गरेको छ। मे महिनामा पहिलोपटक बीईभीको बजार हिस्सा २० प्रतिशत नाघेपछि विद्युतीय सवारीसाधनप्रतिको उपभोक्ता आकर्षण निरन्तर बढिरहेको देखिन्छ।

विश्लेषकहरूका अनुसार विद्युतीय सवारीसाधनका नयाँ–नयाँ मोडलको उपलब्धता, उपभोक्ताको बदलिँदो प्राथमिकता र पेट्रोल–डिजेल सवारीसाधनप्रतिको घट्दो आकर्षणले अस्ट्रेलियाको सवारी बजारको संरचनामै परिवर्तन ल्याइरहेको छ।

चीनको दबदबा थप बलियो

विद्युतीय सवारीसाधनको बढ्दो मागसँगै अस्ट्रेलियाको नयाँ सवारीसाधन बजारमा चीनको प्रभावसमेत उल्लेख्य रूपमा बढेको छ। एफसीएआईका अनुसार सेप्टेम्बरमा अस्ट्रेलियाको कुल नयाँ सवारीसाधन बजारमा चीनबाट आपूर्ति भएका सवारीसाधनको हिस्सा ३५.५ प्रतिशत पुगेको छ। जापानको हिस्सा भने २२.५ प्रतिशत रहेको छ।

चीनले यस वर्षको फेब्रुअरीमा पहिलोपटक अस्ट्रेलियाको नयाँ सवारीसाधन बजारमा सबैभन्दा ठूलो आपूर्तिकर्ताको स्थान हासिल गरेको थियो। त्यसअघि जापानले झन्डै तीन दशकसम्म उक्त स्थानमा आफ्नो प्रभुत्व कायम गरेको थियो।

चिनियाँ विद्युतीय सवारीसाधन निर्माता बीवाईडीको बिक्री वृद्धिले पनि अस्ट्रेलियामा चिनियाँ ब्रान्डको बढ्दो प्रभावलाई देखाएको छ। सन् २०२६ को सेप्टेम्बर अन्त्यसम्म बीवाईडीले अस्ट्रेलियामा ७६ हजार ६१४ वटा नयाँ सवारीसाधन बिक्री गरिसकेको छ। यो अघिल्लो वर्षको सोही अवधिमा बिक्री भएको ३७ हजार ९२३ सवारीसाधनको तुलनामा १०२ प्रतिशत बढी हो।

पेट्रोल तथा डिजेल सवारीसाधनको बिक्री लगातार घट्दै जानु र बीईभी तथा प्लग–इन हाइब्रिडको माग तीव्र रूपमा बढ्नुले अस्ट्रेलियाको अटोमोबाइल उद्योग नयाँ चरणमा प्रवेश गरेको देखाएको छ। विशेषगरी चिनियाँ ब्रान्डको बढ्दो प्रतिस्पर्धा र विद्युतीय सवारीसाधनप्रतिको उपभोक्ताको आकर्षणले आगामी दिनमा अस्ट्रेलियाको सवारी बजारमा प्रतिस्पर्धा अझ तीव्र हुने संकेत गरेको छ।