बगदाद । इराकी सैन्य गुप्तचर बलले पश्चिमी मरुभूमि क्षेत्रमा लागूऔषध तस्करीको ठूलो प्रयास विफल पार्दै करिब २ लाख ५० हजार नशालु गोली बरामद गरेको छ।
इराकी रक्षा मन्त्रालयका अनुसार तस्करहरूले ट्र्याकिङ उपकरण जडान गरिएको बेलुन प्रयोग गरेर लागूऔषध ओसारपसार गर्ने योजना बनाएका थिए। सैन्य गुप्तचर बलले उक्त योजनाबारे सूचना पाएपछि निगरानी बढाउँदै तस्करीको प्रयास विफल पारेको मन्त्रालयले जनाएको छ।
बरामद गरिएको लागूऔषध ठूलो परिमाणमा रहेको जनाउँदै मन्त्रालयले घटनामा संलग्न व्यक्तिहरूको पहिचान तथा उनीहरूको भूमिकाबारे अनुसन्धान भइरहेको जनाएको छ। घटनासम्बन्धी फरेन्सिक अनुसन्धान इकाइले आवश्यक कानुनी प्रक्रिया अघि बढाइरहेको र अनुसन्धान पूरा भएपछि मुद्दा प्रचलित कानुनअनुसार सम्बन्धित निकायमा पठाइने बताइएको छ।
सन् २००३ मा अमेरिकाको नेतृत्वमा भएको सैन्य आक्रमणपछि इराकले लामो समयसम्म राजनीतिक अस्थिरता, हिंसा र द्वन्द्वको सामना गर्दै आएको छ। यस्तो परिस्थितिले देशमा लागूऔषध नियन्त्रण तथा सीमा सुरक्षा व्यवस्थापनलाई थप चुनौतीपूर्ण बनाएको अधिकारीहरूको भनाइ छ।
इराकी सरकारले लागूऔषधको अवैध कारोबारलाई गम्भीर सुरक्षा चुनौतीका रूपमा लिँदै आएको छ। सरकारले लागूऔषध तस्करीबाट हुने आम्दानी आतंकवादी गतिविधिका लागि आर्थिक स्रोत बन्न सक्ने भन्दै यसको नियन्त्रणलाई प्राथमिकतामा राखेको छ।
पश्चिमी मरुभूमि क्षेत्रमा पछिल्लो समय सुरक्षा निगरानी बढाइरहेका बेला ठूलो परिमाणमा नशालु गोली बरामद हुनुलाई इराकी सुरक्षा निकायले लागूऔषध तस्करीविरुद्धको अभियानमा महत्वपूर्ण सफलता मानेको छ। घटनामा संलग्न सञ्जाल र तस्करीको उद्देश्यबारे अनुसन्धान जारी रहेको मन्त्रालयले जनाएको छ। रासस
