काठमाडौँ । दसैँ मनाउन घर फर्किने हतारोले काठमाडौँको नयाँ बसपार्कमा अग्रिम बस टिकट खुल्नुअघि नै यात्रुको भीड लागेको छ। टिकट बुकिङ खुल्ने प्रतीक्षामा केही जिल्लाका यात्रु बिहीबार रातिदेखि नै लाइनमा बसेका छन्।
सरकारले दसैँका लागि शुक्रबारदेखि अग्रिम बस टिकट बुकिङ खुला गर्ने निर्णय गरे पनि बझाङ, बाजुरा र धनगढी जाने यात्रुहरू भने टिकट लिन बिहीबार राति ९ बजेदेखि नै नयाँ बसपार्कमा लामबद्ध हुन थालेका हुन्।
नयाँ बसपार्क सञ्चालन गर्दै आएको लोत्से बहुउद्देश्यीय प्रालिका महाप्रबन्धक पङ्कज मल्लका अनुसार दसैँमा घर जाने यात्रुहरू टिकट पाउने आशामा रातिदेखि नै लाइनमा बसेका छन्। यात्रुको चापलाई व्यवस्थापन गर्दै टिकट बुकिङ सहज बनाउन लोत्सेले नयाँ बसपार्कमा थप १५ वटा टिकट काउन्टर सञ्चालनमा ल्याएको छ।
यातायात व्यवस्था विभाग, नेपाल प्रहरी, यातायात व्यवसायी तथा मजदुरबीच असोज २० गते बसेको बैठकले असोज २३ गतेदेखि दसैँका लागि अग्रिम टिकट बुकिङ खुला गर्ने निर्णय गरेको थियो।
दसैँ नजिकिएसँगै काठमाडौँमा अध्ययन, रोजगारी तथा विभिन्न पेसा–व्यवसायमा संलग्न रहेका नागरिक गाउँ फर्किने तयारीमा छन्। घर जाने यात्रुको चाप बढ्दै जाँदा टिकट व्यवस्थापन र सहज यात्राको चुनौतीसमेत थपिएको छ।
