काठमाडौं । प्रधानमन्त्री वालेन्द्र (बालेन) साहको भारत भ्रमणबारे चर्चा भइरहेका बेला परराष्ट्र मन्त्रालयले भ्रमणको मिति तय भइनसकेको स्पष्ट पारेको छ। पछिल्लो समय मंसिर ७ र ८ गते प्रधानमन्त्री साहले भारत भ्रमण गर्ने समाचार सार्वजनिक भए पनि मन्त्रालयले त्यसको औपचारिक पुष्टि गरेको छैन।
शुक्रबार सिंहदरबारस्थित परराष्ट्र मन्त्रालयमा आयोजित पत्रकार सम्मेलनमा मन्त्रालयका प्रवक्ता लोकबहादुर पौडेल क्षेत्रीले प्रधानमन्त्रीको भारत भ्रमणका लागि आवश्यक गृहकार्य भइरहेको जानकारी दिए। उनले नेपाल र भारत दुवै पक्षलाई अनुकूल हुने समयमा उच्चस्तरीय भ्रमण हुने बताए।
प्रवक्ता क्षेत्रीका अनुसार प्रधानमन्त्रीको भ्रमणको तयारी परराष्ट्र मन्त्रालयले गरिरहेको छ। तर, भ्रमणको मिति भने अहिलेसम्म निश्चित भइसकेको छैन। मिति तय भएपछि औपचारिक रूपमा सार्वजनिक गरिने उनले स्पष्ट पारे।
‘दुवै पक्षलाई अनुकूल हुने समयमा प्रधानमन्त्रीज्यूको भ्रमण हुने नै छ। उच्चस्तरीय भ्रमणको तयारी परराष्ट्र मन्त्रालयबाट भइरहेकै हुन्छ। भ्रमणको मिति तय भइरहेको छैन। मिति तय भइसकेपछि जानकारी गराउने नै छौँ,’ प्रवक्ता क्षेत्रीले भने।
प्रधानमन्त्री साहले पद सम्हालेदेखि नै उनको भारत भ्रमणलाई चासोका साथ हेरिएको छ। यसअघि भ्रमणको सम्भावित मितिबारे विभिन्न समाचार सार्वजनिक भए पनि परराष्ट्र मन्त्रालयको पछिल्लो भनाइले भ्रमणको औपचारिक मिति निर्धारण हुन बाँकी रहेको देखाएको छ।
नेपाल–भारत सम्बन्ध, द्विपक्षीय सहकार्य र उच्चस्तरीय संवादका दृष्टिले प्रधानमन्त्रीको भारत भ्रमणलाई महत्त्वपूर्ण रूपमा हेरिए पनि भ्रमणको मिति र विस्तृत कार्यसूचीबारे भने औपचारिक घोषणा हुन बाँकी छ।
