उदयपुर । उदयपुरमा प्रहरीले एकैदिन दुई स्थानबाट एक हजार ४० केजी ४४० ग्राम लागुऔषध गाँजा बरामद गरेको छ। गाँजा ओसारपसारमा संलग्न रहेको अभियोगमा प्रहरीले एक युवकलाई नियन्त्रणमा लिनुका साथै गाँजा ढुवानीमा प्रयोग गरिएका बोलेरो गाडीसमेत बरामद गरेको छ।
जिल्ला प्रहरी कार्यालयका प्रहरी उपरीक्षक राजन चापागाईंका अनुसार कटारी नगरपालिका र चौदण्डीगढी नगरपालिका क्षेत्रबाट ठूलो परिमाणमा गाँजा बरामद गरिएको हो।
इलाका प्रहरी कार्यालय कटारी र बेल्टारबाट खटिएको प्रहरी टोलीले कटारी नगरपालिका–६ स्थित साँगुरी पुलनजिकैको जङ्गल तथा चौदण्डीगढी नगरपालिका–१ को चारघरेबाट गाँजा बरामद गरेको प्रहरीले जनाएको छ।
प्रहरी उपरीक्षक चापागाईंका अनुसार गए राति कटारी नगरपालिका–६ स्थित साँगुरी पुलनजिकैको जङ्गलमा पाँचवटा बोरामा राखिएको एक सय केजी गाँजा फेला परेको थियो। उक्त गाँजा तिनतलेबाट सिराहातर्फ लैजाँदै गरेको अवस्थामा ताप्ली गाउँपालिका–२ का २२ वर्षीय विश्वराज राईलाई नियन्त्रणमा लिइएको हो।
एकैदिन दुई स्थानबाट ठूलो परिमाणमा गाँजा बरामद भएपछि प्रहरीले लागुऔषध ओसारपसारमा संलग्न व्यक्तिहरू तथा यसको स्रोतबारे थप अनुसन्धान अघि बढाएको जनाएको छ।
