काठमाडौँ । परराष्ट्रमन्त्री शिशिर खनाल र नेपालका लागि इन्डोनेसियाकी गैरआवासीय राजदूत लिस्टयोवतीबीच नेपाल–इन्डोनेसिया द्विपक्षीय सम्बन्ध तथा आपसी सहयोगलाई थप सुदृढ बनाउने विषयमा छलफल भएको छ।
परराष्ट्र मन्त्रालयमा आज भएको शिष्टाचार भेटवार्तामा मन्त्री खनालले नेपालका लागि इन्डोनेसियाको गैरआवासीय राजदूतका रूपमा नियुक्त भएकोमा लिस्टयोवतीलाई बधाई दिँदै उनको सफल कार्यकालको शुभकामना व्यक्त गरे।
भेटका अवसरमा दुवै पक्षले नेपाल र इन्डोनेसियाबीच रहिआएको मैत्रीपूर्ण सम्बन्धलाई थप प्रगाढ बनाउने तथा आपसी सहयोगका क्षेत्रलाई विस्तार गर्ने विषयमा विचार आदानप्रदान गरेका थिए।
परराष्ट्र मन्त्रालयका अनुसार भेटवार्तामा दुई देशबीचको विद्यमान सम्बन्धलाई अझ सुदृढ बनाउने विषयमा छलफल भएको हो।
नेपाल र इन्डोनेसियाबीचको कूटनीतिक सम्बन्धलाई थप प्रभावकारी बनाउँदै पारस्परिक हित र सहकार्यका अवसर विस्तार गर्न यस्ता उच्चस्तरीय भेटवार्ताले सहयोग पुग्ने अपेक्षा गरिएको छ।
