काठमाडौँ । देशमा पश्चिमी वायुको आंशिक प्रभाव कायम रहँदा आगामी दिनमा मौसम क्रमशः बदली हुने देखिएको छ। मौसम पूर्वानुमान महाशाखाका अनुसार बिहीबार कोशी, मधेस, बागमती र गण्डकी प्रदेशका धेरै स्थानमा वर्षाको सम्भावना छ भने केही क्षेत्रमा भारी वर्षा र हिमपातसमेत हुन सक्ने पूर्वानुमान गरिएको छ।
हाल हिमाली तथा पहाडी क्षेत्रमा आंशिक बदली देखिए पनि तराईका अधिकांश स्थानमा मौसम सफा रहेको छ। आज दिउँसो हिमाली भूभागमा आंशिक बादल लाग्नेछ भने पहाडी र तराई क्षेत्रमा मौसम सामान्यतया सफा रहने महाशाखाले जनाएको छ।
आज राति कोशी प्रदेशसहित बागमती, गण्डकी र कर्णाली प्रदेशका हिमाली क्षेत्रमा आंशिक बदली हुने सम्भावना छ। अन्य हिमाली तथा पहाडी क्षेत्रमा भने मौसम मुख्यतया सफा रहने अनुमान छ।
मङ्गलबारदेखि मौसममा बदली बढ्ने देखिएको छ। मङ्गलबार दिउँसो कोशी, मधेस र बागमती प्रदेशमा आंशिक बदली हुने तथा कोशी प्रदेशका हिमाली क्षेत्रका एक–दुई स्थानमा हल्का वर्षा र हिमपात हुन सक्ने महाशाखाले जनाएको छ। राति देशका सबै क्षेत्रमा आंशिक बदली रहनेछ। कोशी, बागमती र गण्डकी प्रदेशका हिमाली तथा पहाडी भूभागका केही स्थानमा हल्का वर्षाको सम्भावना छ।
बुधबार देशभर सामान्यतया बादल लाग्ने पूर्वानुमान गरिएको छ। कोशी, बागमती र गण्डकी प्रदेशका हिमाली क्षेत्रका केही स्थानमा हल्का वर्षा तथा हिमपात हुन सक्नेछ। ती प्रदेशका पहाडी भूभागका एक–दुई स्थानमा पनि हल्का वर्षा हुने सम्भावना रहेको छ।
महाशाखाका अनुसार बिहीबार मौसम थप सक्रिय हुने देखिएको छ। कोशी, मधेस, बागमती र गण्डकी प्रदेशका धेरै स्थानमा तथा लुम्बिनी प्रदेशका केही क्षेत्रमा वर्षा हुन सक्नेछ। कर्णाली र सुदूरपश्चिम प्रदेशका थोरै स्थानमा मेघगर्जन र चट्याङसहित मध्यमसम्मको वर्षा हुने सम्भावना छ।
यसैगरी, कोशी, बागमती र गण्डकी प्रदेशका हिमाली तथा पहाडी भूभागका एक–दुई स्थानमा भारी वर्षा र हिमपात हुन सक्ने अनुमान गरिएको छ। लुम्बिनी प्रदेशको तराई क्षेत्रमा समेत एक–दुई स्थानमा भारी वर्षाको सम्भावना रहेको महाशाखाले जनाएको छ।
मौसममा हुने सम्भावित परिवर्तनलाई ध्यानमा राख्दै वर्षा र हिमपातको सम्भावना भएका क्षेत्रमा यात्रा तथा दैनिक गतिविधि सञ्चालन गर्दा सतर्कता अपनाउनु उपयुक्त हुनेछ।
