काठमाडौं। नेपाल र भारतबीच उच्चस्तरीय कूटनीतिक भेटवार्ताको तयारी भइरहेका बेला नेपालका लागि भारतका नवनियुक्त राजदूत सुधाकर दलेला काठमाडौं आइपुगेका छन् ।
मंगलबार काठमाडौं आइपुगेका दलेलाले अब औपचारिक रूपमा आफ्नो कूटनीतिक जिम्मेवारी सम्हाल्नेछन् । भारत सरकारले उनलाई नेपालका लागि राजदूत नियुक्त गर्नुअघि नेपाल सरकारबाट आवश्यक सहमति (एग्रिमो) प्राप्त गरेको थियो ।
यसअघि नेपालका लागि भारतीय राजदूत रहेका नवीन श्रीवास्तवले कार्यकाल पूरा गरी भारत फर्किएपछि उनको स्थानमा दलेला नियुक्त भएका हुन् ।
सन् १९९३ मा भारतीय विदेश सेवामा प्रवेश गरेका दलेलासँग लामो कूटनीतिक अनुभव छ । उनले इजरायलबाट आफ्नो कूटनीतिक यात्रा सुरु गरेका थिए । त्यसपछि ब्रासिलिया, सिकागो, ढाका, जेनेभा, थिम्पु र वासिङ्टन डीसीस्थित भारतीय कूटनीतिक नियोगमा विभिन्न जिम्मेवारी सम्हालिसकेका छन् । उनी भुटानका लागि भारतीय राजदूतसमेत रहिसकेका छन् ।
यसअघि सन् २०२५ सेप्टेम्बरदेखि भारतीय विदेश मन्त्रालयमा सचिव (आर्थिक सम्बन्ध) को जिम्मेवारीमा रहेका दलेलालाई नेपालसँगको सम्बन्ध र क्षेत्रीय कूटनीतिक मामिलाको राम्रो अनुभव भएको अधिकारीका रूपमा हेरिएको छ ।
प्रधानमन्त्री बालेन्द्र शाहको भारत भ्रमणको तयारी भइरहेका बेला नयाँ राजदूतको आगमनलाई विशेष चासोका साथ हेरिएको छ । उनको नियुक्तिसँगै नेपाल–भारतबीचको आगामी कूटनीतिक संवाद, उच्चस्तरीय भ्रमण र द्विपक्षीय सम्बन्धका विषयले थप गति लिने अपेक्षा गरिएको छ ।
