काठमाडौं । पृथ्वी राजमार्गअन्तर्गत धादिङको मझिमटार खण्डमा आज (मंगलबार) पनि दुई घण्टा सवारी आवागमन बन्द हुने भएको छ। बेनीघाट रोराङ गाउँपालिका–९, मझिमटारमा आकाशे पुल निर्माण तथा सडक स्तरोन्नतिको कामलाई निरन्तरता दिन सवारी आवागमन बन्द गर्न लागिएको जिल्ला प्रशासन कार्यालय धादिङले जनाएको छ।
प्रशासनका अनुसार मंगलबार बिहान ९ बजेदेखि ११ बजेसम्म उक्त सडकखण्डमा सबै प्रकारका सवारीसाधनको आवागमन रोकिनेछ। यसअघि सोही कामका लागि सोमबार तीन घण्टा सवारी आवागमन बन्द गरिएको थियो। निर्धारित समयमा निर्माण कार्य सम्पन्न हुन नसकेपछि आज पुनः सडक बन्द गरेर कामलाई निरन्तरता दिन लागिएको प्रशासनले जनाएको छ।
सडक बन्द हुने समयलाई मध्यनजर गर्दै यात्रु तथा सवारी चालकलाई आफ्नो यात्रा व्यवस्थापन गर्न प्रशासनले आग्रह गरेको छ।
